Узброеныя сілы Швецыі заклікалі адабраць участак расіяніна каля падземнай ваеннай базы

• 26.08.2026, 2:41

Каб прадухіліць рызыкі назірання.

Узброеныя сілы Швецыі падалі заяўку на экспрапрыяцыю аб'екта нерухомасці паблізу ваенна-марской базы Мускё, спасылаючыся на пагрозу нацыянальнай бяспецы з-за знаходжання аб'екта ва ўласнасці грамадзяніна Расіі. Пра гэта паведамляе шведскі тэлеканал TV4 са спасылкай на міністра абароны Паля Ёнсана.

«Узброеныя сілы заявілі, што павінны кантраляваць тэрыторыю, і ў іх ёсць патрэба пашырацца. Гаворка ідзе пра тое, што ім спатрэбіцца пашыраць сваю дзейнасць там, і яны таксама хочуць гарантаваць, што не будзе рызыкі таго, што якія-небудзь суб'екты змогуць весці назіранне або атрымаць тактычную перавагу», — заявіў Ёнсан.

TV4 адзначае, што аб'ект размешчаны паблізу аднаго з уваходаў на базу і мае «унікальныя» ўмовы для яе ўмацавання, перадусім супраць беспілотнікаў.

Шведскае ўпраўленне крэпасцяў (Fortifikationsverket) перадало заяўку на экспрапрыяцыю ў канцылярыю ўрада для далейшага разгляду.

Ёнсан заявіў, што Швецыі неабходна «пазбегнуць тактычных рызык». «Мы будзем працаваць над пашырэннем агульнай абароны цяпер, і мы хочам ведаць, ці ёсць фактары, што абмяжоўваюць пашырэнне ваеннай дзейнасці ў ЕС у святле сур'ёзнай сітуацыі ў сферы бяспекі», — указаў міністр, дадаўшы, што аналагічныя рашэнні могуць быць прыняты і адносна іншых аб'ектаў.

На думку міністра, Стакгольму належыць выбудаваць значна больш надзейную сістэму бяспекі з прычыны ўзмацнення «збору разведвальнай інфармацыі».

Таксама ён адзначыў, што Швецыя хоча пераняць некаторыя законы Фінляндыі, дзе абмяжоўваецца магчымасць набыцця нерухомасці замежнікамі.