У Падораску на азартных таргах прадалі старажытную сядзібу

• 26.08.2026, 10:57

Пераможца заплаціў амаль у 450 разоў больш за стартавую цану.

Сядзібу Чэчатаў-Бахвіцаў у аграгарадку Падораск на Гродзеншчыне прадалі амаль у 450 разоў даражэй за першапачатковую цану.

Падчас таргоў на пляцоўцы «БУТБ-Имущество» кошт лота вырас з 450 да 200 990 рублёў, піша Office Life.

Сядзібу ў Падораску заснаваў прадстаўнік шляхецкага роду Чэчатаў. У 1854 годзе яна перайшла да Рамана, сына пісьменніка Фларыяна Бахвіца. Пры ім цэнтральны дом перабудавалі ў стылі позняга класіцызму. У XIX стагоддзі на тэрыторыі маёнтка таксама заклалі парк і ўзвялі гаспадарчыя пабудовы.

Раней гэты аб'ект не раз выстаўлялі на таргі. У лістападзе 2025-га комплекс хацелі прадаць за 2,16 млн рублёў. У студзені гэтага года кошт знізіўся да 1,08 млн рублёў. А ў лютым ён упаў яшчэ ў 2,5 раза — да 432 тыс. рублёў. На апошнім аўкцыёне стартавая цана склала і ўвогуле 450 рублёў.

На таргі заявіліся 10 удзельнікаў. Барацьба за лот працягвалася больш за чатыры гадзіны. За гэты час было зроблена 4457 ставак, у выніку цана продажу вырасла амаль у 447 разоў — да 200 992 рублёў.

Новым уладальнікам аб'екта стала сталічная кампанія ў сферы адпачынку і забавак. Яна атрымала не толькі палац, але і памяшканні на ўсёй тэрыторыі. Агульная плошча пабудоў — каля 2 тыс. «квадратаў». Па ўмовах таргоў у новага ўласніка будзе тры гады на тое, каб выкарыстоўваць аб'ект для аказання паслуг у сферы аграэкатурызму або рамеснай дзейнасці.