Украіна вывела з ладу 8 з 10 найбуйнейшых складаў Wildberries у Расіі

• 26.08.2026, 11:33

Агульная плошча паражаных цэляў — 1,3 млн квадратных метраў.

Украінскія ўдары пачынаючы з ліпеня вывелі з ладу 8 з 10 найбуйнейшых складаў Wildberries у Расіі.

Пра гэта паведамляе «Агенцтва».

У ноч на 26 жніўня Узброеныя сілы Украіны нанеслі новы ўдар па складах Wildberries. На гэты раз быў атакаваны лагістычны цэнтр кампаніі ў Тамбоўскай вобласці, які пасля ўдару спыніў працу.

Судзячы з паведамлення мясцовых уладаў, комплекс цалкам або амаль цалкам згарэў. Гэта восьмы з 10 найбуйнейшых лагістычных цэнтраў маркетплэйса, выведзеных з ладу ўдарамі з сярэдзіны ліпеня.

Да гэтага ўкраінскія ўдары вывелі з ладу 7 найбуйнейшых складаў Wildberries:

у падмаскоўных Электрасталі і Каледзіне (плошча кожнага складала па 250 тысяч кв. м) — першы цалкам згарэў пасля атакі 18 ліпеня, другі спыніў працу пасля ўдараў і пажару 16 жніўня;

у Новай Усмані Варонежскай вобласці (156 тысяч кв. м) — не працуе пасля атакі 11 жніўня;

у Чырвоным Бары ў Ленінградскай вобласці (154 тысячы кв. м) — спыніў працу пасля атакі 4 жніўня;

у Аляксіне Тульскай вобласці (150 тысяч кв. м) — не працуе пасля атакі 5 жніўня;

у пасёлку Навасемейкіна Самарскай вобласці (128 тысяч кв. м) — не працуе пасля атакі 2 жніўня;

у Сабінскім раёне Уладзімірскай вобласці (119 тысяч кв. м) — не працуе пасля атакі 3 жніўня.

Падвяргаліся атакам, але працягваюць працаваць склады ў Екацярынбургу (157 тысяч кв. м) і Татарстане (150 тысяч кв. м).

Такім чынам, з 1,6 млн кв. м плошчы дзесяці найбуйнейшых складаў Wildberries выведзена з ладу ўжо больш за 1,3 млн (больш за 81%).

Апошнія ўдары па Wildberries

У ноч на 26 жніўня ўкраінскія дроны паразілі лагістычны хаб Wildberries у Котаўску Тамбоўскай вобласці Расіі. На аб'екце ўспыхнуў пажар.

Склад у Котаўску ўжо быў паражоны 18 ліпеня — тады ў выніку пажару загінулі 7 супрацоўнікаў, а сам аб'ект часова прыпыняў працу.