Пуціну даклалі пра вынікі сустрэчы кіраўніка ЦРУ Рэткліфа з расійскімі спецслужбамі

• 26.08.2026, 13:38

Кантактаў з самім дыктатарам РФ не было.

Дыктатар Расіі Уладзімір Пуцін быў аператыўна праінфармаваны пра вынікі сустрэчы дырэктара ЦРУ Джона Рэткліфа з прадстаўнікамі расійскіх спецслужбаў. З самім кіраўніком дзяржавы кантактаў не было, і яны не запланаваныя, заявіў яго прэс-сакратар Дзмітрый Пяскоў.

«Я вам толькі магу сказаць, што адбыліся кантакты па лініі спецыяльных службаў. Магу вам сказаць, што ніякіх сустрэч з прэзідэнтам Расіі не было», — удакладніў Пяскоў на брыфінгу. Прэс-сакратар дадаў, што інфармацыяй пра сустрэчы «па лініі іншых ведамстваў» не валодае.

Дзмітрый Пяскоў назваў кантакты расійскіх і амерыканскіх спецслужбаў пазітыўнай з’явай. Паводле слоў прадстаўніка прэзідэнта, яны працягваюцца нават у самыя складаныя перыяды двухбаковых адносін. Аднак ці дазволяць падобныя сустрэчы вывесці адносіны РФ і ЗША з «найглыбейшага крызісу», казаць заўчасна, заключыў Пяскоў.

25 жніўня ў Маскву з рабочым візітам прыляцеў кіраўнік ЦРУ Джон Рэткліф. Амерыканскія СМІ са спасылкай на крыніцы паведамлялі, што тэмай візіту магла стаць інфармацыя пра падрыхтоўку Расіі да правакацый у дачыненні да еўрапейскіх саюзнікаў па НАТА.