Украіна з 2014 года надала грамадзянства 52 беларускім добраахвотнікам
- 26.08.2026, 17:08
Яшчэ 22 справы беларусаў перададзеныя на разгляд Камісіі пры Прэзідэнце Украіны па пытаннях грамадзянства.
З пачатку расійскай агрэсіі супраць Украіны украінскае грамадзянства атрымалі 52 беларускія добраахвотнікі, якія ваявалі на баку Украіны. Яшчэ 22 справы беларусаў ужо перададзеныя на разгляд Камісіі пры Прэзідэнце Украіны па пытаннях грамадзянства. Пра гэта паведаміла Дзяржаўная міграцыйная служба Украіны ў адказ на запыт выдання «Суспільне».
Да пачатку паўнамаштабнага расійскага ўварвання грамадзянства Украіны атрымалі 12 беларускіх добраахвотнікаў, а пасля лютага 2022 года — яшчэ 40.
У чэрвені 2025 года Вярхоўная Рада Украіны ўнесла змены ў заканадаўства аб атрыманні і захаванні грамадзянства. У прыватнасці, для замежнікаў, якія служаць у Сілах абароны Украіны, умовы спрасцілі. Цяпер, каб атрымаць права прэтэндаваць на грамадзянства, ім дастаткова адслужыць па кантракце адзін год замест ранейшых трох.
Звычайна разгляд заявы аб прыняцці ў грамадзянства, калі не патрабуецца дадатковая праверка, павінен займаць не больш за восем месяцаў. Пры гэтым заявы замежнікаў, якія ўдзельнічалі ці ўдзельнічаюць у абароне Украіны, разглядаюцца ў першачарговым парадку.
Беларускія добраахвотнікі, якія ваююць на баку Украіны, а таксама члены іх сем’яў могуць легалізаваць сваё знаходжанне ва Украіне нават з пратэрмінаваным беларускім пашпартам. Яны могуць атрымаць від на жыхарства або падаць дакументы на грамадзянства. Аднак для гэтага неабходна мець арыгінал дакумента.
У міграцыйнай службе адзначаюць, што для многіх беларускіх добраахвотнікаў замена пашпарта немагчымая без вяртання ў Беларусь, што можа быць для іх небяспечна. Пры гэтым дакладнага механізму аднаўлення беларускага пашпарта ва Украіне пакуль няма.
Каб вырашыць гэтую праблему, Дзяржаўная міграцыйная служба распрацавала адпаведны законапраект і перадала яго ў Міністэрства ўнутраных спраў для ўзгаднення. Пакуль жа замежныя вайскоўцы, якія засталіся без асноўнага дакумента, могуць звярнуцца па статус бежанца або асобы, якая мае патрэбу ў дадатковай абароне.
Акрамя таго, з мая па жнівень 2026 года часовыя віды на жыхарства ўпершыню або пры абмене атрымалі 45 грамадзян Беларусі, якія служаць у Сілах абароны Украіны.
Улік такіх дакументаў пачалі весці з мая. Раней замежным добраахвотнікам для пацвярджэння законнасці знаходжання ва Украіне было дастаткова вайсковага білета і кантракта. Цяпер усе дзеючыя замежныя вайскоўцы Сіл абароны Украіны павінны прайсці працэдуру легалізацыі да 10 лістапада 2026 года.