NYT: Дзякуючы сістэме «Дэльта» Украіна можа паразіць мэту на полі бою за тры хвіліны

• 27.08.2026, 8:37

Раскрытыя падрабязнасці пра працу ўнікальнага вайсковага праграмнага забеспячэння.

Украінскія вайскоўцы працуюць у сістэме «Дэльта», якая збірае адзіную лічбавую карціну поля бою для кіравання і якую амерыканскія вайскоўцы называюць самай магутнай зброяй Украіны. Пра тое, як працуе сістэма, распавядаецца ў артыкуле The New York Times.

Падкрэсліваецца, што праграма збірае даныя і дапамагае ідэнтыфікаваць мэты, каб каардынаваць працу розных падраздзяленняў. Яна аб’ядноўвае патокі інфармацыі і размеркоўвае мэты для як мага хутчэйшага знішчэння. Аўтары дадалі, што ад хуткасці залежыць перавага на полі бою.

У прыватнасці, скараціўся час паражэння мэты. Адзін з камандзіраў «Хартыі» распавёў, што раней з моманту паведамлення падраздзялення пра пазіцыі праціўніка да першага артылерыйскага стрэлу праходзіла не менш за 20 хвілін. Цяпер гэта займае ад трох да пяці хвілін.

Адна з карысных функцый, якую адзначаюць камандзіры, — магчымасць адсочваць мэты ў часе. Напрыклад, збіраюцца даныя пра асобныя расійскія гаўбіцы, заўважаныя на полі бою. Вайскоўцы могуць паглядзець, калі яе ўпершыню ўбачылі і калі былі спробы атакі. Гэта дапамагае пазбегнуць паўтарэння памылак.

Стварэнне праграмнага забеспячэння

Падкрэсліваецца, што магутнае ПЗ «Дэльта» распрацавана менавіта ў Украіне. Вытокі распрацоўкі сягаюць 2014 года, калі пачалі выкарыстоўвацца першыя беспілотнікі, але даныя ад іх да падраздзяленняў дайходзілі вельмі доўга. Цяпер Украіна дадае функцыі штучнага інтэлекту і распрацоўвае чат-ботаў, якія можна інтэграваць у «Дэльту». Міністр арміі ЗША Дэніэл Дрыскол адзначыў, што амерыканскія сістэмы не валодаюць усім наборам функцый украінскай сістэмы.

Журналісты прывялі словы Кацярыны Бондар, старшага навуковага супрацоўніка Цэнтра стратэгічных і міжнародных даследаванняў у Вашынгтоне, пра тое, што Расія распрацоўвае аналаг «Дэльты», але Украіна захоўвае перавагу. Заходнія арміі, папярэдзіла яна, павінны хутка наганяць упушчанае, інакш рызыкуюць адстаць.