У Пецярбургу падарвалі расійскага падпалкоўніка

• 27.08.2026, 12:09

Мужчына загінуў на месцы.

У Санкт-Пецярбургу на Калпінскай шашы ў аўтамабілі спрацавала самаробная выбуховая прылада, паведамляе «Фонтанка».

Паводле звестак выдання, у машыне знаходзіліся вайсковец і яго жонка. Мужчына загінуў на месцы, жанчыну шпіталізавалі. «Фонтанка» сцвярджае, што ў сужэнцаў адарвала ногі ў выніку выбуху. Выданне піша, што загінулы меў званне падпалкоўніка.

Выбух адбыўся раніцай 27 жніўня каля крамы «Магніт». Сведкі расказалі, што каля 10-й раніцы вайсковец разам з жонкай пачалі ад'язджаць ад свайго дома, у гэты момант у іх машыне спрацавала выбуховая прылада.

Як адзначае «Агенцтва», выбух адбыўся ў мікрараёне, які актыўна забудоўваўся жыллём для вайскоўцаў. У 2010 годзе аглядаць кватэры, што ўзводзіліся для вайскоўцаў, прыязджаў Уладзімір Пуцін, які тады займаў пасаду прэм'ер-міністра.