Пяць дронаў заляцелі ў Малдову пасля атакі РФ на Украіну

• 27.08.2026, 12:34

Міністэрства абароны краіны раскрыла першыя падрабязнасці.

Уначы 27 жніўня некалькі беспілотнікаў невядомага паходжання парушылі паветраную прастору Малдовы. Гэта адбылося ўжо пасля заканчэння масіраванай атакі Расіі на Украіну.

Пра гэта паведамляе Newsmaker.

Журналісты атрымалі звесткі пра ўварванне дронаў на тэрыторыю Малдовы ад Міністэрства абароны краіны.

Першы беспілотнік перасёк дзяржаўную мяжу з боку Украіны а 03:56 у раёне населенага пункта Беляеўка. Вядома, што пасля гэтага ён накіраваўся ў напрамку Паланкі Штэфан-Водскага раёна. Крыху пазней пазначаны БПЛА пакінуў паветраную прастору Малдовы і вярнуўся ў напрамку Украіны.

Што да другога дрона, дык ён увайшоў з боку ўкраінскай вёскі Старокозаче. А 03:59 ён праляцеў над вёскай Капланы, а ў 04:10 знік з сістэм маніторынгу ў раёне вёскі Карагасаны Штэфан-Водскага раёна.

«Трэці БПЛА а 04:09 перасёк дзяржаўную мяжу з Украіны і праляцеў па маршруце Паланка - Крокмаз - Оланешты - Пуркарь - Раскаец. А 04:24 беспілотнік знік з радараў каля горада Першамайск у Прыднястроўскім рэгіёне Малдовы», — паведамляе выданне.

Як удакладнілі ў Мінабароны Малдовы, яшчэ адзін беспілотнік парушыў паветраную прастору а 04:16 у напрамку Паланкі, пасля чаго вярнуўся ва Украіну ў напрамку вёскі Маякі.

«У той жа час а 05:50 паблізу пункта пропуску Сайцы (Малдова) - Лесное (Украіна), на мяжы паміж Каушанскім раёнам Малдовы і Украінай, беспілотнік перасёк паветраную прастору абедзвюх краін. А 06:02 ён накіраваўся ў напрамку Леснога і пакінуў паветраную прастору Малдовы», — піша СМІ.

Варта адзначыць, што ўсё гэта адбывалася пасля завяршэння паветраных атак РФ на Украіну.

У Мінабароны Малдовы таксама ўдакладнілі, што адсочваць беспілотнікі ім дапамагалі саюзнікі.