Крэмль аплаквае «боснійскага мясніка»
- 28.08.2026, 7:57
У Расіі дагэтуль не прызнаюць генацыд у Срэбраніцы.
МЗС РФ і пасольства РФ у Сербіі адрэагавалі на смерць былога камандуючага арміяй боснійскіх сербаў генерала Ратка Младзіча, які атрымаў мянушку «боснійскі мяснік». У расійскім МЗС апублікавалі паведамленні са словамі спачавання яго сям’і.
Аб гэтым паведамляе МЗС Расіі.
Як адзначаецца ў заяве дыпламатычнага ведамства РФ, справа Младзіча, «якія б ні былі фактычныя абставіны, што ляглі ў яе аснову, стала вопітым праяўленнем двайных стандартаў і антысербскага ўхілу трыбуналу».
«Выказваем шчырыя спачуванні ягоным родным і блізкім», — гаворыцца ў паведамленні МЗС Расіі.
За што асудзілі Ратко Младзіча
Ратко Младзіч камандаваў арміяй боснійскіх сербаў падчас вайны ў Босніі і Герцагавіне 1992–1995 гадоў. Міжнародны трыбунал па былой Югаславіі ў 2017 годзе прызнаў яго вінаватым у генацыдзе, злачынствах супраць чалавечнасці і парушэннях законаў і звычаяў вайны і прызначыў пажыццёвае зняволенне. У 2021 годзе апеляцыйная інстанцыя пацвердзіла прысуд і пакаранне.
Адзін з ключавых эпізодаў справы — разня ў Срэбраніцы ў ліпені 1995 года. Пасля захопу сіламі боснійскіх сербаў абвешчанай ААН «зонай бяспекі» Срэбраніцы было забіта больш за 8 тысяч боснійскіх мусульман — пераважна мужчын і хлопчыкаў. Трыбунал кваліфікаваў гэтыя падзеі як генацыд. У міжнародных СМІ Младзіча часта называлі «боснійскім мясніком».
Младзіча таксама прызналі адказным за іншыя цяжкія злачынствы падчас вайны. У прыватнасці, суд устанавіў яго віну ў пераследзе, вынішчэнні, забойствах, дэпартацыях і прымусовым перамяшчэнні насельніцтва, тэрарызацыі мірных жыхароў у Сараеве і захопе закладнікаў з ліку персаналу ААН.
Цынічная рэакцыя Младзіча ў судзе
Падчас суда ў Гаазе Ратко Младзіч паводзіў сябе выклічна. Напрыклад, падчас паказанняў маці адной з ахвяр разні ў Срэбраніцы ён правёў сабе па горле рукой, імітуючы рух нажом.
Акрамя таго, многія ультраправыя нацыяналісты ў Сербіі дагэтуль лічаць Младзіча героем. Ні яны, ні РФ не прызнаюць вынікі Гаагскага трыбуналу.