Лаўроў паскардзіўся Ватыкану на Украіну, але ўсё пайшло не па плане

• 28.08.2026, 12:04

Кіраўнік МЗС Расіі схлусіў.

Міністр замежных спраў РФ Сяргей Лаўроў схлусіў кіраўніку дыпламатыі Ватыкана Полу Рычарду Галахеру, быццам ва Украіне парушаюцца правы чалавека, у тым ліку рэлігійныя.

Пра гэта паведамляе РБК-Украіна.

«Я пацікавіўся ў прадстаўніка Ватыкана, наколькі яны ўспрымаюць гэтыя ж правы чалавека, у прыватнасці рэлігійныя правы. І ён сказаў, што гэта нядобра», — заявіў Лаўроў, аднак ніякіх доказаў сваім словам не прадставіў.

Больш за тое, расійскі дыпламат дадаў, што папрасіў Галахера падчас наступных кантактаў з Украінай «перадаць сігнал» Кіеву.

На гэтым фоне Лаўроў нагадаў, што нядаўна кіраўнік дыпламатыі Ватыкана наведаў украінскую сталіцу.

Нягледзячы на гэта, Галахер нібыта не перадаваў украінскаму боку ніякіх скаргаў або сігналаў ад Масквы, бо, паводле яго слоў, яму не хапіла часу.

«І я спытаў, ці падымалі яны гэтыя тэмы, бо Ватыкан сочыць за ўсімі перапетыямі ў сусветным рэлігійным асяроддзі, ва ўсіх сусветных рэлігіях. І яны не маглі не ведаць, што адбываецца... Ён прызнаўся, што яму не хапіла часу», — заявіў Лаўроў.

Што вядома пра пазіцыю кіраўніка дыпламатыі Ватыкана адносна Украіны

Пол Рычард Галахер ніколі публічна не выступаў з прамой крытыкай Украіны, кшталту заяў пра тое, што ўкраінскія ўлады сістэмна парушаюць правы чалавека або пераследуюць вернікаў.

Наадварот, у яго публічных заявах адносна Украіны пераважна ішлося пра падтрымку міру, гуманітарную дапамогу і неабходнасць спынення вайны. Напрыклад, у лютым 2025 года Галахер заклікаў спыніць вайну ва Украіне і адзначаў важнасць дыялогу і гуманітарных мерапрыемстваў.

У верасні 2025 года падчас Генасамблеі ААН ён назваў вайну ва Украіне адным з найбольш балючых крызісаў і заявіў пра неабходнасць яе спынення. Пры гэтым Галахер гаварыў пра абарону грамадзянскага насельніцтва і выкананне міжнароднага гуманітарнага права, але не абвінавачваў Украіну ў парушэнні правоў чалавека.

Цікава, што ў ліпені 2026 года Галахер сам наведаў Украіну, у прыватнасці Кіеў і Бярдычаў. Vatican News апісваў яго паездку як місію, падчас якой ён гаварыў пра пакуты ўкраінцаў і неабходнасць усталявання міру.