Politico: У некаторых рэгіёнах расіяне пачалі супраціў мабілізацыі

• 28.08.2026, 12:26

Патэнцыйныя прызыўнікі рэагуюць не толькі масавымі ўцёкамі ў Грузію.

Расіяне пачалі масава пакідаць краіну на фоне асцярогаў, што Крэмль рыхтуецца абвясціць новую хвалю мабілізацыі для папаўнення арміі, піша Politico (пераклад — сайт Charter97.org).

За адзін тыдзень праз памежны пункт Верхні Ларс на мяжы Расіі і Грузіі выехалі больш за 113 тысяч расіян. Рэзкі рост колькасці тых, хто з’язджае, звязваюць з асцярогамі наконт магчымага прызыву.

«Пры гэтым расійскія ўлады афіцыйна адмаўляюць падрыхтоўку новай мабілізацыі. Аднак адначасова Крэмль узмацняе сістэму ўліку і набору рэзервістаў. Працадаўцаў абавязалі перадаваць дзяржаве персанальныя даныя патэнцыйных вайскоўцаў, а рэзервістаў загадзя размеркоўваюць па вайсковых часцях», — гаворыцца ў матэрыяле.

Дадатковым інструментам сталі электронныя павесткі. Пасля іх атрымання ваеннаабавязанаму аўтаматычна могуць забараніць выезд з краіны. Пашыраецца і ўдзел Расгвардыі ў мерапрыемствах, звязаных з пошукам і прызывам людзей.

Па ацэнках украінскага боку, расійскія страты на фронце ужо перавышаюць магчымасці набору новых добраахвотнікаў. Праваабаронцы лічаць, што ранейшая сістэма прыцягнення людзей за кошт буйных выплат і вербавання зняволеных паступова сябе вычэрпвае.

«Сацыяльны кантракт паміж дзяржавай і насельніцтвам дае ўсё больш трэшчын», — адзначаюць эксперты.

Спробы Крамля знайсці альтэрнатыўныя спосабы папаўнення арміі таксама сутыкаюцца з праблемамі. У прыватнасці, праграма прыцягнення студэнтаў у падраздзяленні беспілотных сістэм не апраўдала чаканняў. У некаторых рэгіёнах ціск на патэнцыйных прызыўнікоў ужо выклікае супраціў і самаарганізацыю.