Лукашэнка паабяцаў Мішусціну дапамагчы Расіі па «дробязях з палівам»

• 28.08.2026, 16:38

Удары ЗСУ па НПЗ пакінулі РФ без паліва.

Тавараабарот паміж Масквой і Мінскам за пяць месяцаў вырас на 12,5%. Пра гэта заявіў прэм'ер-міністр Расіі Міхаіл Мішусцін на сустрэчы з дыктатарам Беларусі Аляксандрам Лукашэнкам. Апошні запэўніў, што беларускія партнёры гатовыя працягваць выконваць свае абавязацельствы па пастаўках тавараў, у тым ліку паліва.

«Хачу сказаць, што наш узаемны тавараабарот сістэмна расце... І спадзяюся, што яшчэ далей па тэмпах росту мы павінны палепшыць яго структуру», — заявіў Мішусцін.

Расійскі прэм'ер адзначыў, што краіны вядуць шмат сумесных праектаў у сферы прамысловай кааперацыі. Таксама на парадку дня застаюцца пытанні, звязаныя з лічбавізацыяй і электронікай, у тым ліку ўзаемным прызнаннем электроннага лічбавага подпісу.

Лукашэнка падзякаваў Міхаілу Мішусціну і ўраду Расіі за «бездакорнае выкананне сваіх абавязацельстваў» перад рэжымам. Узурпатар запэўніў са свайго боку, што ўсе абавязацельствы выконваюцца і будуць выкананыя «ад дробязяў з палівам — дызелем, рознымі бензінамі і гэтак далей... да сур'ёзных сістэмных пытанняў».