ЗСУ нанеслі ўдар па аэрадроме «Гвардзейскае» ў Крыме

• 29.08.2026, 9:03

На спадарожнікавых здымках бачны пажар.

У ноч на 29 жніўня Сілы абароны Украіны нанеслі ўдар па ваенных і стратэгічных аб’ектах расійскіх акупантаў у анексаваным Крыме. Паводле папярэдняй інфармацыі, мэтай атакі стаў расійскі ваенны аэрадром у Гвардзейскім. Пра гэта паведамляе «Крымскі вецер».

Акупацыйная адміністрацыя абвясціла на паўвостраве паветраную трывогу яшчэ ўвечары 28 жніўня. У раёне мыса Фіялент у Севастопалі мясцовыя жыхары чулі некалькі магутных выбухаў. Каля поўначы серыя выбухаў прагрымела ў раёне Гвардзейскага — непадалёк ад Сімферопаля.

Мяркуецца, што ўдар ЗСУ прыйшоўся менавіта па ваенным аэрадроме, які актыўна выкарыстоўвае авіяцыя акупацыйнай арміі РФ. Паводле адкрытых звестак, на гэтай базе дыслакуецца 37-ы авіяцыйны полк Паветрана-касмічных сіл Расіі. Менавіта адсюль узлятаюць расійскія фронтавыя бамбавікі Су-24М і штурмавікі Су-25СМ, якія наносяць удары па пазіцыях украінскіх войскаў, украінскіх гарадах і аб’ектах грамадзянскай інфраструктуры.

Адзначаецца, што ўкраінскія вайскоўцы і раней наносілі ўдары па аэрадроме ў Гвардзейскім — у прыватнасці, у ноч на 18 ліпеня 2026 года там таксама фіксавалі серыю выбухаў.