Адзін з галоўных аграрных рэгіёнаў Расіі ўвёў рэжым надзвычайнай сітуацыі

• 29.08.2026, 10:28

З-за немагчымасці вывезці збожжа на экспарт.

Растоўская вобласць — адзін з галоўных сельскагаспадарчых рэгіёнаў Расіі, які забяспечвае краіну амаль 10% ураджаю збожжа, — з 28 жніўня ўводзіць рэжым надзвычайнай сітуацыі, паведаміў у пятніцу рэгіянальны ўрад.

З-за атак беспілотнікаў з сярэдзіны ліпеня спынена праца партоў Азоўскага мора, праз якія штомесяц на экспарт адпраўлялася да 1,5 мільёна тон расійскага збожжа. Што прывяло «да назапашвання ў сельскагаспадарчых таварных вытворцаў значных аб’ёмаў сельскагаспадарчай прадукцыі», цытуе «Інтэрфакс» распараджэнне губернатара Растоўскай вобласці Юрыя Слюсара.

Сітуацыя, што склалася, можа «пацягнуць парушэнне ўмоў жыццядзейнасці людзей, значныя матэрыяльныя страты», гаворыцца ў дакуменце.

Эканамічная сітуацыя для аграрыяў «выглядае вельмі дрэнна», «поўнасцю спыніліся адгрузкі ў Азоўскім басейне», канстатуе прэзідэнт Расійскага збожжавага саюза Аркадзь Злачэўскі. Услед за азоўскімі портамі ў жніўні спынілі працу найбуйнейшыя збожжавыя тэрміналы Чорнага мора, якія таксама трапілі пад удары БПЛА.

У выніку паралізаванымі аказаліся больш за 80% магутнасцяў па вывазе расійскага збожжа. У жніўні, паводле ацэнак «Совэкона», экспарт пшаніцы ўпаў да 16-гадовага мінімуму — 1,9 млн тон. У параўнанні са жніўнем-2025 аб’ёмы ўпалі ў 2,3 раза, а адносна сярэдняга значэння за 5 гадоў — у 2,6 раза.

Расійскі Мінсельгас рыхтуецца пачаць дзяржаўныя закупкі збожжа, а таксама прапрацоўвае альтэрнатыўныя маршруты экспарту, аж да партоў Паўночнага Ледавітага акіяна. Але рэальных альтэрнатыў не праглядаецца, лічыць Злачэўскі. Каб экспартаваць збожжа праз Балтыйскае мора, трэба выкарыстоўваць парты Латвіі і Літвы, калі яны ўвогуле пагодзяцца прапусціць груз, а Высоцкі збожжавы тэрмінал Пецярбурга мае абмежаваную магутнасць — 3 млн тон у год, нагадвае ён. Праз чарнаморскія парты ў норме больш збожжа вывозіцца за адзін месяц.

Перапоўненыя элеватары і немагчымасць прадаць збожжа штурхаюць унутраныя цэны ўніз, змушаючы аграрыяў прадаваць ураджай за бясцэнак. Сярэдняя цана пшаніцы 4-га класа ў еўрапейскай частцы Расіі на мінулым тыдні апусцілася да 8 575 рублёў за тону без ПДВ, а гэта на 35% ніжэй за ўзровень пачатку сезона, адзначае «Совэкон»