Па Еўропе хадзяць смяротна небяспечныя «галовы Трампа»
- 30.08.2026, 9:10
Галандскі інстытут абвясціў спецыяльнае «чырвонае папярэджанне».
У Еўропе з'явіліся небяспечныя таблеткі экстазі ў форме галавы прэзідэнта ЗША Дональда Трампа. Яны ўтрымліваюць значную колькасць асабліва небяспечнага рэчыва, якое можа прывесці да смерці.
Пра гэта паведамляе Politico.
Таблеткі, якія даследавалі спецыялісты інстытута ў Нідэрландах, выпускаюць у розных колерах. Яны маюць форму галавы амерыканскага прэзідэнта і надпісы «Trump» і «NL».
Інстытут Трымбос — цэнтр даследавання наркотыкаў і залежнасцяў, размешчаны ва Утрэхце, — у сувязі з з'яўленнем такіх таблетак абвясціў спецыяльнае «чырвонае папярэджанне».
Там падкрэслілі, што гэтыя таблеткі нельга ўжываць ні пры якіх абставінах. Пакуль невядома, колькі такіх таблетак у абароце. У той жа час некалькі пунктаў тэставання наркотыкаў ужо атрымалі іх для правядзення аналізу, паведаміла прадстаўніца інстытута Аннік Гротгейс.
Паводле яе слоў, раней спецыялісты сустракалі таблеткі ў форме лагатыпа Супермена або з сімволікай аўтамабільных брэндаў.
Склад таблетак
У Інстытуце Трымбос паведамілі, што ў таблетках утрымліваецца вельмі вялікая колькасць параметаксіметамфетаміну, або PMMA.
Па сваіх уласцівасцях гэта рэчыва падобнае да MDMA — актыўнага кампанента таблетак экстазі, якія ўжываюць некаторыя наведвальнікі клубаў і якія сталі асабліва папулярнымі з развіццём рэйв-культуры ў 1980–1990-я гады.
Разам з тым PMMA значна больш небяспечны, адзначылі спецыялісты.
Праз некалькі гадзін пасля ўжывання рэчыва ў чалавека раптоўна могуць з'явіцца млоснасць, пачашчэнне сардэчнага рытму, курчы і вельмі высокая тэмпература цела.
Ужыванне такіх таблетак можа прывесці да перагрэву арганізма з патэнцыйна смяротным вынікам.
Стаўленне Трампа да наркотыкаў
Сам Дональд Трамп, як вядома, не ўжывае алкаголь і крытычна ставіцца да забароненых псіхатропных рэчываў, на чым грунтуецца яго антынаркатычная кампанія ў ЗША.
Напярэдадні выбараў у ЗША ў 2024 годзе ў інтэрв'ю падкастару Тэо Вону ён назваў кокаін «бруднай і агіднай рэччу».
Нядаўна Белы дом прадставіў новую стратэгію барацьбы з наркотыкамі.