Новы тэлескоп НАСА адправіўся шукаць светы, прыдатныя для жыцця

• 31.08.2026, 16:55

Яго шлях вядзе да межаў Сусвету.

НАСА паспяхова запусціла касмічны тэлескоп Nancy Grace Roman, які павінен дапамагчы вучоным даследаваць цёмную энергію і матэрыю, чорныя дзіркі і планеты па-за межамі Сонечнай сістэмы. Пра гэта паведамляе BBC (пераклад — сайт Charter97.org).

Старт адбыўся ў нядзелю з касмадрома імя Кенэдзі ва Фларыдзе. Прыблізна праз 30 хвілін пасля запуску тэлескоп аддзяліўся ад ракеты SpaceX і пачаў шлях да працоўнай кропкі прыкладна ў мільёне міляў ад Зямлі.

Галоўная асаблівасць Roman — велізарнае поле агляду. Паводле дадзеных НАСА, ён зможа ахопліваць вобласць неба прыблізна ў 100 разоў большую, чым тэлескопы «Хабл» і «Джэймс Уэб». У агенцтве разлічваюць выявіць дзесяткі тысяч, а магчыма, да 100 тысяч новых экзапланет.

«Roman зменіць тое, як мы глядзім на Сусвет», — заявіла прадстаўніца НАСА Ніккі Фокс.

Тэлескоп таксама будзе вывучаць працэсы, звязаныя з цёмнай матэрыяй і цёмнай энергіяй. Разам яны, паводле ацэнак вучоных, складаюць каля 95% Сусвету, аднак іх прырода дагэтуль застаецца адной з галоўных загадак сучаснай навукі.

Адна з мэт місіі — пошук патэнцыйна прыдатных для жыцця светаў. «Адно з галоўных пытанняў НАСА — ці мы адны ў Сусвеце?» — сказала Фокс.

Асноўная місія Roman разлічаная на пяць гадоў, аднак апарат можа прапрацаваць да дзесяці. Вучоныя спадзяюцца, што яго назіранні дазволяць стварыць маштабныя карты галактык і лепш зразумець, як Сусвет змяняўся на працягу мільярдаў гадоў.