Над Беларуссю пранясецца першы восеньскі зоркапад

• 31.08.2026, 17:15

Але ўбачыць яго будзе складана.

Аўрыгіды адносяцца да метэорных патокаў сярэдняй інтэнсіўнасці. Іх радыянт знаходзіцца ў сузор'і Возніча, побач з зоркай Капэла. Родапачынальнікам зоркападу стала камета C/1911 N1 Kiess.

Сёлета Аўрыгіды актыўныя з 28 жніўня па 5 верасня і дасягаюць максімуму ў ноч з 31 жніўня на 1 верасня. У ноч піку, паводле прагнозаў, яны змогуць даць да 6 метэораў за гадзіну пры ідэальна цёмным небе. Аднак яркі Месяц у перыяд піку істотна скараціць колькасць «падаючых зорак», якія можна будзе ўбачыць.

Першы восеньскі зоркапад адрозніваецца малой колькасцю метэораў, але перыядычна дэманструе ўсплёскі. Дзякуючы аднаму з іх, што адбыўся ў 1935 годзе, навукоўцы і змаглі выявіць гэты паток. Нечаканыя кароткія ўсплёскі таксама адзначаліся ў 1986, 1994 і 2019 гадах. Максімальная колькасць «падаючых зорак» тады дасягала 30–50 успышак за гадзіну.