Беларусаў папярэдзілі пра вакцыну, якую будуць скідаць з самалётаў

• 31.08.2026, 20:38

Яе нельга браць у рукі.

Вакцынацыя дзікіх драпежных жывёл будзе праводзіцца ў Мінскай вобласці з 1 верасня, паведамілі ў Мінаблвыканкаме.

Удакладняецца, што аральная імунізацыя дзікіх драпежных жывёл з выкарыстаннем прынад супраць шаленства, якія ўтрымліваюць вакцыну, будзе праводзіцца з выкарыстаннем авіяцыі.

Гэта прынада ўяўляе сабой брыкет ад шэрага да цёмна-карычневага колеру масай 25 грамаў. Яна выраблена з кампанентаў кармоў, ядомых для драпежных жывёл (ялавічны тлушч, рыбная мука), і мае спецыфічны пах. У гэтай прынадзе змяшчаецца капсула з вакцыной.

Насельніцтва папярэджваюць, што забаронена браць прынады рукамі і скармліваць іх хатнім жывёлам. Вядома ж, нельга дапускаць і дзяцей да прынад. Калі вакцына (змесціва капсулы) выпадкова трапіла ў вочы, рот, нос або на пашкоджаныя ўчасткі цела, неабходна звярнуцца да лекара.