У Венесуэле пачаліся перамовы паміж уладамі і апазіцыяй

• 7.08.2026, 13:20

Дыялог адбываецца пры падтрымцы ЗША.

У Каракасе пачаліся перамовы паміж часовым урадам Венесуэлы і прадстаўнікамі апазіцыі, скіраваныя на палітычны пераход і аднаўленне дэмакратычных інстытутаў у краіне.

Як піша CNN, перамовы пачаліся праз тыдзень пасля першапачаткова запланаванай даты — 1 жніўня. Дыялог адбываецца пры падтрымцы ЗША.

Урадавую дэлегацыю ўзначальвае старшыня Нацыянальнай асамблеі Венесуэлы Хорхе Радрыгес, брат в.а. прэзідэнта Дэльсі Радрыгес.

Апазіцыйны блок прадстаўляе былая дэпутат Нацыянальнай асамблеі Дынора Фігера. У склад дэлегацыі ўвайшлі былыя парламентарыі склікання 2015 года, якое раней прызнавалася ў ЗША легітымным.

Пры гэтым у перамовах не ўдзельнічаюць лідары апазіцыі Марыя Карына Мачада і былы кандыдат у прэзідэнты Эдмундо Гансалес Урруція. Абодва палітыкі знаходзяцца па-за межамі краіны і заявілі, што будуць сачыць за ходам дыялогу і спадзяюцца, што ён прывядзе да правядзення выбараў.

Чакаецца, што бакі абмяркуюць умацаванне дэмакратыі, гарантыі палітычных правоў, а таксама пытанні, звязаныя з аднаўленнем краіны пасля разбуральных землятрусаў у чэрвені.