ЗША дапамогуць Украіне палепшыць ракеты для савецкіх сістэм СПА С-300
- 7.08.2026, 17:59
Абноўленыя ракеты паступяць на ўзбраенне украінскай арміі ўжо да канца 2026 года.
ЗША працуюць разам з Украінай над удасканаленнем боепрыпасаў для створанага яшчэ ў СССР зенітна-ракетнага комплексу С-300, паведаміў тэлеканалу PBS палкоўнік у адстаўцы Роберт Гамільтан. «Працягваюцца сумесныя амерыкана-ўкраінскія намаганні, накіраваныя на мадэрнізацыю старых ракет С-300 або на стварэнне больш сучаснай версіі, якая палепшыць іх магчымасці», — сказаў Гамільтан у перадачы News Hour. Паводле яго слоў, абноўленыя ракеты з’явяцца на ўзбраенні украінскай арміі ўжо да канца 2026 года. Ён таксама дадаў, што ўдасканаленыя ракеты-перахопнікі будуць выпускацца ў колькасці некалькіх сотняў на год.
Паведамленне пра мадэрнізацыю боепрыпасаў для сістэм С-300 з’явілася на фоне адмовы прэзідэнта ЗША Дональда Трампа прадастаўляць Украіне дадатковыя перахопнікі для комплексаў супрацьпаветранай абароны (СПА) Patriot. Кіраўнік Украіны Уладзімір Зяленскі казаў, што Кіеў востра мае патрэбу ў боепрыпасах для абароны ад расійскіх паветраных удараў і прасіў Трампа перадаць не менш за сотню ракет. Аднак, паводле дадзеных Financial Times, кіраўнік Белага дома адхіліў просьбу, адзначыўшы, што ЗША патрэбныя боепрыпасы для абароны аб’ектаў ЗША на Блізкім Усходзе.
Зяленскі таксама прасіў даць Украіне ліцэнзію на вытворчасць перахопнікаў Patriot. Гэтае пытанне ён абмяркоўваў з Трампам на пачатку ліпеня на перамовах у Анкары. Прэзідэнт ЗША спачатку дапусціў перадачу ліцэнзіі, але пазней адмовіўся ад гэтага. «Гэта зусім выключная зброя, і мы павінны быць крыху асцярожныя ў тым, каму выдаём ліцэнзіі. Насамрэч мы не ліцэнзуем вытворчасць узбраенняў», — казаў кіраўнік Белага дома.
Тым часам, паводле слоў Зяленскага, пастаўкі ва Украіну ракет для СПА ад заходніх партнёраў у першай палове 2026-га скараціліся ў тры разы ў параўнанні з аналагічным перыядам мінулага года. «Абарона ад расійскай ракетнай пагрозы з’яўляецца найважнейшай задачай дзеля захавання жыццяў нашых людзей. Усе партнёры ведаюць, як і чым могуць дапамагчы. Несвоечасовасць дапамогі, затрымкі ў пастаўках антыбалістычных ракет — гэта якраз тыя разбурэнні і ахвяры», — адзначаў Зяленскі. Пры гэтым ён дадаваў, што «ракеты ў партнёраў ёсць».