Апытанне: Залужны і Фёдараў перамаглі б Зяленскага на выбарах
- 7.08.2026, 18:38
Дзеючы прэзідэнт Украіны перамог бы Парашэнку.
Паводле вынікаў апытання Цэнтра сацыяльных і маркетынгавых даследаванняў Socis, апублікаваных 6 жніўня, у выпадку правядзення прэзідэнцкіх выбараў ва Украіне ў найбліжэйшы час у другі тур выйшлі б дзеючы прэзідэнт Уладзімір Зяленскі і былы галоўнакамандуючы ЗСУ, цяпер пасол Украіны ў Вялікабрытаніі Валерый Залужны.
У першым туры Зяленскі атрымаў бы падтрымку 22,3% выбарцаў, а Залужны — 21,4%. Далей ідуць былы міністр абароны Міхаіл Фёдараў з 13,1%, кіраўнік Галоўнага ўпраўлення разведкі Кірыл Буданаў — 8,3% і экс-прэзідэнт Пятро Парашэнка — 6,1%.
Паводле дадзеных даследавання, у другім туры Залужны атрымаў бы перамогу над Зяленскім, набраўшы 66,2% галасоў супраць 33,8% сярод рэспандэнтаў, якія вызначыліся з выбарам і маюць намер удзельнічаць у галасаванні. Аналагічны вынік, паводле апытання, паказалі б і Фёдараў або Буданаў у выпадку выхаду ў другі тур супраць дзеючага прэзідэнта. Пры гэтым у гіпатэтычным супрацьстаянні з Пятром Парашэнкам перамогу, наадварот, атрымаў бы Зяленскі.
Калі б выбары ў Вярхоўную Раду адбыліся ў найбліжэйшы час, найбольшую падтрымку атрымалі б умоўныя палітычныя блокі Валерыя Залужнага (19,4%) і Міхаіла Фёдарава (17,9%). Партыя «Слуга народу» заняла б трэцяе месца з вынікам 12,7%, а ўмоўны блок Кірыла Буданава набраў бы 9,7%.
Стаўленне да кадравых рашэнняў
Большасць удзельнікаў апытання негатыўна ацанілі адстаўку Міхаіла Фёдараваў з пасады міністра абароны. Поўнасцю або хутчэй не падтрымалі гэта рашэнне 62,5% рэспандэнтаў, у той час як станоўча да яго паставіліся 19,6%.
Больш за палову апытаных лічаць, што пратэсты супраць адстаўкі міністра не паўплываюць на абараназдольнасць краіны. Яшчэ 16,6% мяркуюць, што яны здольныя яе ўзмацніць, а 16,3% — што, наадварот, аслабяць.
У той жа час большасць рэспандэнтаў падтрымала адстаўку былога галоўнакамандуючага ЗСУ Аляксандра Сырскага, пра якую раней паведамлялі СМІ на фоне яго меркаванага канфлікту з Фёдаравым і грамадскіх пратэстаў.
Апытанне праводзілася з 28 ліпеня па 2 жніўня метадам асабістых інтэрв'ю (CAPI) сярод 2000 паўналетніх жыхароў тэрыторый, падкантрольных Украіне, дзе не вядуцца актыўныя баявыя дзеянні. Заяўленая статыстычная памылка даследавання складае ±2,6 працэнтнага пункта.