У Малі знішчана група расійскіх спецназаўцаў
- 10.09.2026, 10:44
Джыхадысты захапілі зброю наёмнікаў РФ.
Падкантрольны Мінабароны РФ «Афрыканскі корпус» панёс страты ў Малі. На рэсурсах мясцовых джыхадыстаў 7 верасня з'явіліся відэа прынамсі чатырох забітых расійскіх наёмнікаў. Судзячы па захопленай зброі, яны маглі быць байцамі аднаго з спецпадраздзяленняў Узброеных сіл РФ. Гэта далёка не першыя ахвяры сярод байцоў расійскай групоўкі, што прыйшла на змену ПВК «Вагнер». «Вот Так» распавядае, што вядома пра загінулых у Малі расійскіх наёмнікаў.
Што вядома пра забітых расіян
У панядзелак, 7 верасня, афрыканскія маніторынгавыя праекты са спасылкай на рэсурсы групоўкі «Джамаат Нусрат аль-Іслам валь-Муслімін» (філіял «Аль-Каіды» ў афрыканскім Сахелі) паведамілі пра гібель расійскіх наёмнікаў у малійскім рэгіёне Мопці. Згодна з апублікаванай інфармацыяй, у засаду каля горада Софара трапіў сумесны патруль «Афрыканскага корпуса» і членаў адной з лакальных малійскіх арганізацый самаабароны.
Невзабаве з'явіліся фота, а потым і відэа забітых. На іх выразна відаць целы светласкурых мужчын з кульнымі раненнямі. На адным з ролікаў каментатар за кадрам — джыхадыст — кажа, што гэта вагнераўцы [ПВК «Вагнер» афіцыйна завяршыла працу ў Малі летам 2025 года, ёй на змену прыйшоў падкантрольны Мінабароны РФ «Афрыканскі корпус»].
Вечарам 8 верасня рэсурсы джыхадыстаў размясцілі фота зброі і асабістых рэчаў забітых. На іх выразна бачныя шлемы, на якія налеплены патчы з надпісамі па-руску «Набіралі па здароўі, а пытаюцца як з разумных» і «Сям'я сказала: беражы сябе», а таксама шэўрон з анёлам-ахоўнікам і словамі «Я заўсёды побач!».
Патруль перасоўваўся на пікапах і матацыклах. Першымі ехалі расійскія наёмнікі. Джыхадысты заявілі, што захапілі ў якасці трафеяў дзве машыны і 14 байкаў (на відэа бачна як мінімум 12), а таксама зброю і боепрыпасы.
У прыватнасці, ісламскія баевікі паказалі тры мадэрнізаваныя расійскія аўтаматы АК-15 ўзору 2023 года. Такая зброя, як правіла, выкарыстоўваецца байцамі спецпадраздзяленняў Узброеных сіл РФ.
На кадрах відаць прынамсі чатыры целы забітых — меркавана, расіян. У ўсіх — кульныя раненні ў галаву. Магчыма, іх дабівалі. Аднак, паводле слоў прадстаўнікоў «Джамаат Нусрат аль-Іслам валь-Муслімін», усяго яны забілі пяць расійскіх наёмнікаў, а ў засадзе, як сцвярджаецца, загінулі таксама восем афрыканцаў, што іх суправаджалі.
На апублікаваных джыхадыстамі кадрах відаць, што як мінімум адзін забіты наёмнік быў у форме і экіпіроўцы, тыповай для байцоў «Афрыканскага корпуса» ў Малі.
Рэсурсы наёмнікаў маўчаць пра страты
Большасць рэсурсаў расійскіх наёмнікаў у Афрыцы на момант публікацыі гэтага матэрыялу не каментавала гібель сваіх байцоў.
Ускосна страты расіян пацвердзіў 8 верасня звязаны з былой ПВК «Вагнер» акаўнт у сацыяльнай сетцы X Wagner Truth 1W9:
«Некаторыя людзі думаюць, што праца ў Афрыцы — выдатны спосаб расслабіцца, сядзець, нічога не робячы, харчавацца экзатычнымі фруктамі і ляжаць пад пальмамі. Не, нават тут ідзе вайна і гінуць людзі. Яны выкарыстоўваюць выбухоўку, дроны, збіваюць верталёты, падпальваюць бранямашыны, страляюць з мінамётаў і ладзяць добра спланаваныя засады».
У дзень знішчэння расійска-малійскага патруля, 7 верасня, тэлеграм-канал «Афрыканскі корпус | Місія за мяжой» напісаў, што ў раёне Софары вайскоўцы выявілі групу баевікоў, якія спрабавалі ўгнаць статак.
Пры спробе пераследу, паводле слоў аўтара пабліка, тыя выкарыстоўвалі ўдарныя беспілотнікі, але пазней іх ліквідавалі. Пра засаду, у якой тут жа загінулі расіяне, у гэтым пабліку і іншых рэсурсах «Афрыканскага корпуса» не прагучала ні слова.