Украінскую сістэму РЭБ «Ай-Петры» ўпершыню паказалі на выставе ў Польшчы
- 10.09.2026, 18:37
Сістэма здольная выяўляць мэты на адлегласці 20–30 кіламетраў.
Украінскую сістэму радыёэлектроннай барацьбы «Ай-Петры» ўпершыню прадэманстравалі на міжнароднай выставе MSPO-2026, якая праходзіць у Польшчы, піша «Оборонка».
Распрацоўка здольная глушыць сігналы кіравання беспілотнікамі, а таксама падаўляць кіраваныя авіябомбы.
Распрацоўку сістэмы РЭБ пачалі ў 2014 годзе, калі РФ анексавала Крым. Назву «Ай-Петры» выбралі ў гонар найвышэйшай гары паўвострава, растлумачыў прадстаўнік кампаніі Storkway, якая распрацавала і вырабляе сістэму.
Паводле яго слоў, комплексы тактычнага ўзроўню пастаўляюцца на фронт з 2024 года і, у прыватнасці, узаемадзейнічаюць з 12-м Цэнтрам спецыяльнага прызначэння. Кампанія ўжо паставіла каля 400 сістэм РЭБ, якія працуюць уздоўж усёй лініі судакранання.
«Ён можа быць выкананы ў двух варыянтах: стацыянарны або мабільны. Перавозіцца ён на пікапе, можа лёгка разгортвацца за 10 хвілін двума чальцамі экіпажа і пачаць функцыянаваць. Яго склад: паваротная платформа, на якой усталёўваюцца модулі, кожны з якіх мае два каналы — «джамеры». Таксама модуль мае антэну для выяўлення і радар, які «слухае» радыёчастоты дронаў, што набліжаюцца», — распавёў суразмоўца выдання.
Сродак РЭБ працуе ў дыяпазоне частот ад 300 да 6000 тысяч мегагерц. «Ай-Петры» мае функцыю поўнага павароту і скануе прастору на 360 градусаў, а вугал ахопу адной лагарыфмічнай антэны складае каля 45 градусаў.
У рэжыме выяўлення комплекс спажывае магутнасць 250 ватаў, а падчас падаўлення мэт — да 2 тысяч ватаў. Паводле прадстаўніка кампаніі Storkway, у залежнасці ад рэльефу сродак здольны выяўляць мэты на адлегласці 20–30 кіламетраў.
Вытворца распрацаваў уласнае праграмнае забеспячэнне для комплексу «Ай-Петры», асновай якога з’яўляецца сістэма сітуацыйнай дасведчанасці «Ліра». Яна дазваляе збіраць даныя з іншых радараў і фармаваць цэласнае поле для выяўлення і перахопу паветраных пагроз.
«Мы маем магчымасць інтэгравацца з радыёлакацыйным полем. У нас ёсць прамая сувязь з радарамі Robin, Saab Giraffe, і наша сістэма «Ліра» аб’ядноўвае ўсю гэтую інфармацыю і дае даныя пра месцазнаходжанне, каб мы маглі эфектыўна кіраваць гэтым сродкам», — сказаў суразмоўца выдання.
Пяты прэзідэнт Украіны Пятро Парашэнка, дабрачынны фонд якога набыў першыя партыі комплексу, распавёў, што сістэму РЭБ «Ай-Петры» ўпершыню прадэманстравалі на міжнароднай выставе. Комплекс плануюць выкарыстоўваць для абароны аб’ектаў крытычнай інфраструктуры, партоў, а таксама вядуць працу над рашэннем для прыкрыцця аб’ектаў чыгункі.