Расія стала сусветным лідарам па ўцечках персанальных даных грамадзян
- 11.09.2026, 19:06
Гэтая лічба ўдвая большая, чым у краінах Лацінскай Амерыкі, Блізкага Усходу, Афрыкі і СНД.
У Расіі за 2025-ы і першыя шэсць месяцаў 2026 года зафіксавана 326 уцечак даных, у выніку чаго былі скампраметаваныя 1,175 млрд радкоў з данымі расійскіх карыстальнікаў, падлічылі аналітыкі кампаніі-распрацоўшчыка ІТ-рашэнняў для барацьбы з кіберзлачыннасцю F6. Гэтая колькасць уцечак баз даных амаль у два разы перавысіла аналагічны паказчык у краінах Лацінскай Амерыкі, Блізкага Усходу і Афрыкі, Азіяцка-Ціхаакіянскага рэгіёну і іншых дзяржаў СНД разам узятых (164 выпадкі), перадае Comnews.
Паводле слоў тэхнічнага кіраўніка дэпартамента кіберразведкі F6 Алены Шамшынай, у першым паўгоддзі 2026 года назіралася скарачэнне колькасці «злітых» баз даных расійскіх кампаній. Аднак зламыснікі, адзначыла эксперт, працягваюць на «беспрэцэдэнтна высокім узроўні» атакаваць расійскія арганізацыі «з мэтай нанесення максімальнай шкоды».
«У Расіі гістарычна сфармавалася адна з самых глыбокіх лічбавых экасістэм. «Госуслуги», банкінг, тэлемедыцына, дастаўка, каршэрынг — усё гэта генеруе каласальныя масівы персанальных даных. Там, дзе шмат даных, там шмат і патэнцыйных кропак адмовы. У краінах Лацінскай Амерыкі, Блізкага Усходу або Афрыкі ўзровень пранікнення лічбавых сэрвісаў часта ніжэйшы, а значыць, і ўкрасці пакуль асабліва няма чаго — аб'ём назапашаных даных меншы», — адзначыў старшыня савета па супрацьдзеянні тэхналагічным правапарушэнням КС НСБ (Каардынацыйнага савета недзяржаўнай сферы бяспекі) Расіі Ігар Бядзераў.
Расія і раней трапляла ў сусветныя топы па аб'ёмах «злітых» у сетку даных. Так, па выніках 2024 года на расійскія дзяржаўныя органы і камерцыйныя кампаніі прыпала 778 з 9175 вядомых сусветных выпадкаў кампраметацыі даных. Гэта 8,5% сусветных уцечак. Такім чынам РФ апынулася на другім месцы па гэтым паказчыку пасля ЗША (36,1%), гаворыцца ў адпаведным дакладзе InfoWatch. На трэцяй пазіцыі была Індыя (5,4%), а следам Вялікабрытанія (3,8%) і Канада (2,9%).