У Літву з тэрыторыі Беларусі ўпершыню заляцеў дрон
- 15.09.2026, 7:37
Яго збілі самалёты НАТА.
У ноч з 14 на 15 верасня ў Літве быў абвешчаны жоўты ўзровень паветранай пагрозы з-за дрона, які парушыў паветраную прастору. Неўзабаве знішчальнікі НАТА збілі яго.
Пра гэта паведамляе Delfi са спасылкай на допіс прэзідэнта Літвы Гітанаса Наўседы у сацсетцы Х.
Згодна з публікацыямі ў СМІ, у ноч на 15 верасня Узброеныя сілы Літвы папярэдзілі пра патэнцыйную паветраную пагрозу. Неўзабаве стала вядома, што прычынай стаў дрон, які заляцеў у краіну з тэрыторыі Беларусі.
Праз некаторы час кіраўнік Цэнтра кіравання крызіснымі сітуацыямі Вільмантас Віткаускас паведаміў, што дрон быў знішчаны.
«Так, хвіліну таму я атрымаў інфармацыю пра паспяховае знішчэнне дрона», — сказаў ён.
Пазней у гэтым Цэнтры ўдакладнілі, што дрон быў знішчаны ў Кайшядорыскім раёне, недалёка ад вёскі Праткунай. Па папярэдніх даных, беспілотнік увайшоў у паветраную прастору Літвы з тэрыторыі Беларусі.
Яшчэ праз некаторы час прэзідэнт Літвы Гітанас Наўседа таксама афіцыйна пацвердзіў, што над краінай быў дрон, і знішчальнікі НАТА яго паспяхова знішчылі.
«Беспілотнік, які толькі што ўвайшоў у паветраную прастору Літвы, быў знішчаны знішчальнікамі НАТА. Дзякую персаналу саюзнікаў за аператыўную рэакцыю. Ва ўмовах узмацнення агрэсіі Расіі супраць Украіны такая гатоўнасць жыццёва важная для нашага рэгіёна. Разам з нашымі саюзнікамі па НАТА Літва будзе абараняць сваю паветраную прастору», — падсумаваў ён.
Дрон знішчылі італьянскія вайскоўцы, якія ўдзельнічаюць у місіі НАТА па ахове паветранай прасторы краін Балтыі, паведамілі ў Узброеных сілах Літвы.
«Не будзем спяшацца з высновамі. Будзе праведзена расследаванне і ацэнены ўсе абставіны. Справа ў тым, што падобных інцыдэнтаў менш не стане, самае важнае на дадзены момант — гэта нейтралізацыя пагрозы і адсутнасць небяспекі для насельніцтва. Дзякуем саюзнікам за аператыўную рэакцыю і дакладны стрэл», — заявілі літоўскія вайскоўцы.
Невядомы аб’ект заўважылі ў паветранай прасторы Літвы прыблізна апоўначы. Для яго перахопу з авіябазы Шаўляй узняліся італьянскія знішчальнікі. Каля 00:20 вайскоўцы ідэнтыфікавалі аб’ект як беспілотнік і збілі яго.
Абломкі дрона знайшлі ў раёне вёскі Праткунай Кайшядорыскага раёна, недалёка ад Каўнаса. Месца ачапілі, там працуюць вайсковая і звычайная паліцыя. Пагрозы для мясцовых жыхароў няма.
Адзначаецца, што гэта першы выпадак за час уварвання РФ ва Украіну, калі беспілотнік быў збіты над тэрыторыяй Літвы. Усяго за два дні да гэтага ў краіне таксама абвяшчалі паветраную трывогу і ўзнімалі знішчальнік НАТА, аднак тады адзнакі на радарах аказаліся статкам птушак.