У Мінску зноў зацвілі каштаны

• 16.09.2026, 10:36

Незвычайную прыродную з'яву заўважылі ў сярэдзіне верасня.

У Мінску на вуліцы Чарвякова заўважылі квітнеючыя каштаны, паведамляе агенцтва «Мінск-Навіны».

Падобныя выпадкі ў нашай краіне фіксаваліся і раней. З нядаўніх — у жніўні каштаны зацвілі ў Брэсце.

Спецыялісты кажуць, што паўторнае цвіценне дрэў адбываецца з-за капрызаў надвор'я або стрэсу дрэва.

— Анамальна цёплыя восеньскія і зімовыя дні падаюць ілжывыя сігналы, і натуральныя прыродныя рытмы парушаюцца. Сонца прыгравае, пупышкі набухаюць… А потым рэзка прыходзяць замаразкі. Расліны, вядома, вучацца прыстасоўвацца да такіх катаклізмаў, але ўсё адно гэта вялікі стрэс для іх, які можа прывесці да аслаблення, а то і да гібелі жывога арганізма, — тлумачыў дырэктар Інстытута эксперыментальнай батанікі НАН Беларусі, кандыдат біялагічных навук Дзмітрый Груммо.