Мінімальная зарплата ў Польшчы вырасла да 1314 долараў

• 16.09.2026, 12:13

Таксама вырасце мінімальная пагадзінная стаўка.

Савет міністраў Польшчы апублікаваў 15 верасня пастанову аб велічыні мінімальнай заработнай платы і мінімальнай пагадзіннай стаўкі ў 2027 годзе, паведамляе Gazeta Prawna.

З 1 студзеня 2027 года мінімальная заработная плата ў Польшчы павялічыцца з 4806 да 4950 злотых брута (з 1277 да 1314 долараў), гэта значыць на 3%.

Таксама вырасце мінімальная пагадзінная стаўка — да 32,30 злотых брута. Менавіта гэтыя сумы будуць вызначаныя заканадаўствам, аднак для працаўніка найважнейшае тое, колькі ў выніку паступіць на яго рахунак. Фактычнае павышэнне заробку будзе меншае. Працаўнік будзе атрымліваць каля 3703,93 злотых «на рукі», тады як у 2026 годзе гэтая сума складала каля 3605,85 злотых.

Гэта азначае на 98,08 злотых больш у месяц, гэта прыкладна на 2,72% больш «на рукі». За ўвесь 2027 год гэта дае амаль 1177 злотых больш, чым пры мінімальнай зарплаце, якая дзейнічала ў 2026 годзе.

Павышэнне мінімальнай заработнай платы з 1 студзеня 2027 года закране істотную колькасць працаўнікоў. У сакавіку 2026 года 12,2% занятых у Польшчы атрымлівалі заработную плату брута, якая не перавышала мінімальную. Калі ўлічыць 15 млн 70,1 тыс. занятых (дадзеныя за сакавік 2026 года), гэта складае каля 1,84 млн чалавек.