Кіраўнікі земляў Германіі ад ХДС выказалі падтрымку Мерцу
- 16.09.2026, 20:20
Ціск на канцлера ФРГ нарастае напярэдадні выбараў у Берліне і Мекленбургу — Пярэдняй Памераніі.
Восем прэм’ер-міністраў федэральных земляў Германіі ад Хрысціянска-дэмакратычнага саюза (ХДС) выказалі падтрымку канцлеру Фрыдрыху Мерцу у разгарэлайся дыскусіі пра яго палітычную будучыню. «Людзі могуць быць упэўненыя, што мы займаемся вырашэннем іх праблем. Як прэм’ер-міністры мы хочам і будзем разам з федэральным канцлерам уносіць свой уклад у гэтую працу», — гаворыцца ў сумеснай заяве, апублікаванай у сераду, 16 верасня, за чатыры дні да выбараў у Мекленбургу — Пярэдняй Памераніі і Берліне.
Шлях да аднаўлення даверу выбарцаў ляжыць праз уменне слухаць людзей і канкрэтныя палітычныя крокі, а не праз кадравыя перастановы, перакананыя аўтары заявы. «Палітычнай Германіі цяпер як ніколі патрэбная стабільнасць. У гэтых умовах асабліва важныя згуртаванасць, здольнасць дзейнічаць і выразны курс нямецкіх хрысціянскіх дэмакратаў», — гаворыцца ў дакуменце.
Кіраўнікі ўрадаў земляў падкрэслілі, што ўлады ФРГ павінны вырашаць праблемы і адказваць на пытанні, з якімі людзі сутыкаюцца ў паўсядзённым жыцці. Яны катэгарычна адхілілі ідэю ўрада меншасці і пацвердзілі гатоўнасць супрацоўнічаць з «усімі дэмакратычнымі сіламі» — гэтай фармулёўкай было пацверджана рашэнне партыйнага з’езда 2018 года, якое выключала супрацоўніцтва з Левай партыяй і правапапулісцкай «Альтэрнатывай для Германіі» (АдГ), адзначае DW са спасылкай на агенцтва dpa.
Правальны вынік ХДС на выбарах у Саксоніі-Ангальце аказаў моцны ціск на Мерца ўнутры яго партыі. Ужо некалькі дзён цягнуцца разважанні пра тое, ці зможа ён захаваць пасаду канцлера. Аўтарытэтныя кіраўнікі зямельных урадаў раней не ўмешваліся ў гэтыя дэбаты, аднак цяпер адкінулі размовы пра кадравыя перастановы.
У выпадку правалу ХДС на будучых выбарах у землях Мекленбурга — Пярэдняй Памераніі і Берліне ціск на Мерца можа яшчэ ўзрасці, лічаць назіральнікі. Сам Фрыдрых Мерц заявіў 15 верасня на сустрэчы з прадстаўнікамі Федэральнага аб’яднання аптовага і знешняга гандлю, што сыходзіць са сваёй пасады да бліжэйшых выбараў у Бундэстаг ён не збіраецца і хоча даказаць, што ўзначаленая ім кіроўная кааліцыя «здольная праводзіць палітыку рэформаў».
На вечар 20 верасня, калі адбудуцца выбары ў ландтагі Мекленбурга — Пярэдняй Памераніі і Берліна, Мерц прызначыў пазачарговую сустрэчу кіраўніцтва ХДС. На 21 верасня таксама запланаваныя пасяджэнні іншых кіраўнічых органаў партыі. Тады, верагодна, будзе вырашана пытанне пра далейшую будучыню Фрыдрыха Мерца як канцлера і старшыні ХДС, піша dpa.