Саветнік прэзідэнта Украіны: расійскія «Шахеды» выкарыстоўваюць мабільныя сеткі Беларусі

• 17.09.2026, 10:55

Беларуская сувязь дапамагае збіраць даныя для пракладання маршрутаў дронаў.

Расіяне змянілі тактыку і выкарыстоўваюць беларускія мабільныя сеткі для перадачы інфармацыі і пракладання бяспечных калідораў для сваіх беспілотнікаў, якія атакуюць Украіну. Пра гэта ў інтэрв’ю Радыё NV расказаў пазаштатны саветнік прэзідэнта Украіны па тэхналагічных пытаннях і эксперт у галіне тэхналогій Сяргей Флэш Бескрэстнаў.

— Цяпер нельга сказаць, што Расія неяк выкарыстоўвае Беларусь. У мяне ёсць такое назіранне — я ўжо пісаў пра гэта: калі прасачыць за рухам рэактыўных і звычайных «Шахедаў», бачна, што яны трымаюцца паблізу мяжы з Беларуссю. І я прыйшоў да высновы: верагодна, гэтыя беспілотнікі маюць сувязь з камерцыйнымі сеткамі LTE ў Беларусі, — адзначыў Бескрэстнаў.

Ён расказаў, што ў расійскіх «Шахедах» цяпер ёсць два LTE‑мадэмы: ёсць вонкавыя антэны, ёсць SIM‑карткі расійскага аператара з падключаным роўмінгам у Беларусі.

— То бок гаворка не пра тыя кропкі mesh‑кіравання «Шахедамі» ў рэальным часе, якія існавалі раней. Гэта зусім іншая гісторыя. Гэта трэкінг, службовая інфармацыя: «Шахед» не кіруецца анлайн, ён перадае даныя тэлеметрыі — інфармацыю пра тое, дзе ён фіксуе працу сродкаў РЭБ, а дзе іх няма. Гэта важна для Расіі: яны выкарыстоўваюць гэтыя даныя для пракладання маршрутных калідораў і аналізу палётаў сваіх беспілотнікаў.

Флэш таксама адзначыў, што беларускія ўлады маглі б адключыць або абмежаваць гэты роўмінг, але па нейкіх прычынах гэтага не робяць. Акрамя таго, Бескрэстнаў папярэдзіў, што Украіне трэба быць гатовай да таго, што Мінск можа дазволіць РФ выкарыстоўваць сваю тэрыторыю для запуску беспілотнікаў.

— Я шмат разоў казаў: калі, напрыклад, Беларусь дазволіць расіянам запускаць рэактыўныя «Шахеды» са сваёй тэрыторыі на захад Украіны, гэта стане праблемай. Бо пад ударам апынуцца Львоў, Луцк, Ковель — абсалютна ўсе гарады, што знаходзяцца ў зоне дасягальнасці рэактыўных «Шахедаў». Гэта будзе праблемай.

Так, зараз мы не фіксуем, што Беларусь гэта робіць. Але я разумею, што пастаянна праходзяць сустрэчы Пуціна з Лукашэнкам, яны пра нешта дамаўляюцца. І такі варыянт сапраўды магчымы — гэта верагодны сцэнар. Трэба гэта разумець і выбудоўваць абарону з прыцэлам на будучыню. І ўсе меры бяспекі, што дзейнічаюць цяпер у Кіеве, магчыма, стануць актуальнымі і для заходняй часткі Украіны, — заявіў спецыяліст.