У Літве пачаліся маштабныя ваенныя вучэнні «Гром Перкунаса»

• 17.09.2026, 11:51

Яны працягнуцца месяц.

Узброеныя сілы Літвы ў чацвер пачынаюць вучэнні па нацыянальнай абароне «Гром Перкунаса – 2026», каб праверыць гатоўнасць арміі і дзяржаўных ведамстваў да пераходу ад мірнага часу да крызіснага і ваеннага становішча.

Пра гэта паведамляе LRT.

Манэўры працягнуцца да 15 кастрычніка. Падчас вучэнняў ацэняць гатоўнасць штабоў і падраздзяленняў літоўскай арміі да выканання задач, прадугледжаных планамі абароны дзяржавы, а таксама іх узаемадзеянне з саюзнікамі па НАТА.

У межах вучэнняў будзе адпрацавана актывацыя Стратэгічнага камандавання Узброеных Сіл Літвы, каардынацыя дзеянняў з Аб'яднаным камандаваннем сіл НАТА ў Брюнсюме, службамі МУС, Нацыянальным цэнтрам кіравання крызісамі і муніцыпалітэтамі.

Вайскоўцы адпрацуюць рэагаванне на асіметрычныя і гібрыдныя пагрозы, узмацненне аховы межаў і крытычнай інфраструктуры, актывацыю сіл хуткага рэагавання і мабілізацыйныя працэдуры. Таксама будзе праверана дакамплектаванне армейскіх падраздзяленняў вайскоўцамі актыўнага рэзерву.

Літоўскія вучэнні пройдуць разам з манеўрамі НАТА Steadfast Duel 2026. На нацыянальным узроўні яны будуць сінхранізаваныя з іншымі вучэннямі Узброеных Сіл Літвы і дзяржаўных ведамстваў.

У верасні і кастрычніку ў манеўрах возьмуць удзел каля 4,2 тысячы літоўскіх вайскоўцаў, а ў розныя падраздзяленні будуць прызваныя да 2,4 тысячы вайскоўцаў актыўнага рэзерву.

Падчас вучэнняў таксама будуць актываваныя вайсковыя камендатуры і праверана іх узаемадзеянне з армейскімі падраздзяленнямі і іншымі ведамствамі.