Прэм’ер Канады падтрымаў беспрэцэдэнтнае збліжэнне з ЕС

• 17.09.2026, 15:11

Краіна можа стаць першым «асацыяваным членам» Еўрасаюза.

Прэм’ер-міністр Канады Марк Карні выступіў перад Еўрапарламентам у Страсбургу. Ён падтрымаў прапанову старшыні Еўракамісіі Урсулы фон дэр Ляен зрабіць Канаду першым «асацыяваным членам» Еўрасаюза і падкрэсліў, што новае аб’яднанне ствараецца не ў супрацьвагу іншым сусветным дзяржавам, паведамляе The New York Times.

Я не прапаную ствараць трэці блок, які стаў бы супернікам вялікіх дзяржаў, хай і з лепшымі манерамі. Мы не імкнёмся да ўлады, каб дамінаваць над іншымі.

Еўропа і Канада хочуць аб’яднацца дзеля абароны сваіх адкрытых рынкаў, суверэнітэту, тэрытарыяльнай цэласнасці, свабод і верхавенства права, дадаў прэм’ер-міністр. Ён прапанаваў Еўропе «паглыбіць супрацоўніцтва» ў такіх галінах, як здабыча карысных выкапняў, абарона, энергетычная бяспека, а таксама ў сферах электроннага гандлю і развіцця ШІ.

Карні не сказаў, што менавіта будзе азначаць для Канады і Еўропы статус «асацыяванага члена». У дзеючым заканадаўстве ЕС такога статусу няма, і каб яго замацаваць, спатрэбіцца адабрэнне ўсіх 27 краін-удзельніц.

Больш канкрэтыкі можа з’явіцца пасля саміту ЕС — Канада ў Манрэалі, які запланаваны на 29–30 кастрычніка. Пакуль Рада ЕС не апублікавала падрабязны парадак дня, падрабязнасці павінны з’явіцца на сайце напярэдадні мерапрыемства.

Прэзідэнт ЗША Дональд Трамп раскрытыкаваў прапанову Еўракамісіі, назваўшы збліжэнне ЕС і Канады «смехатворным», а Канаду — «жудасным гандлёвым партнёрам». Ён пагразіў увесці супраць Еўропы высокія мыты або спыніць гандаль па шэрагу пазіцый, калі палічыць дзеянні ЕС «хоць у якой-небудзь ступені варожымі».