СМІ даведаліся, калі Трамп падпіша закон аб «пякельных санкцыях» супраць Расіі

• 18.09.2026, 8:55

Законапраект афіцыйна накіраваны ў Белы дом.

Прэзідэнт ЗША Дональд Трамп, верагодна, ужо ў пятніцу, 18 верасня, падпіша зацверджаны абедзвюма палатамі Кангрэса закон аб новых санкцыях супраць Расіі і Ірана, які, у прыватнасці, надае кіраўніку Белага дома права ўводзіць тарыфы да 100% у дачыненні да краін, якія набываюць расійскія энергарэсурсы.

Пра гэта ў чацвер напісаў журналіст RFE/RL Алякс Раўфаглу на сваёй старонцы ў сацсетцы X, спасылаючыся на крыніцы ў Вашынгтоне. Паводле слоў карэспандэнта, законапраект афіцыйна накіраваны ў Белы дом.

«Некалькі крыніц паведамілі мне, што Трамп, як чакаецца, можа падпісаць законапраект аб санкцыях супраць Расіі і Ірана ўжо заўтра. Законапраект афіцыйна накіраваны ў Белы дом, пацвердзілі двое памочнікаў прадстаўнікоў Рэспубліканскай партыі», — напісаў журналіст.

Крыніцы выдання Kyiv Independent таксама пацвярджаюць, што амерыканскі лідар мае намер падпісаць вышэйзгаданы законапраект у найбліжэйшы час.

Да гэтага пра намер кіраўніка Белага дома падпісаць гэты дакумент паведаміла газета The Wall Street Journal са спасылкай на крыніцу ў амерыканскай адміністрацыі.