У гонар каго насамрэч назвалі Snickers
- 18.09.2026, 10:38
Сакрэт знакамітага батончыка, пра які мала хто ведае.
Батончык Snickers вядомы ва ўсім свеце, але далёка не кожны ў курсе, што стаіць за назвай гэтай шакаладкі.
Амерыканская кампанія Mars выпусціла Snickers яшчэ ў 1930 годзе, а ў Велікабрытаніі, дзе гэты батончык з’явіўся толькі больш як праз 30 гадоў, у 1960-я, ён да 1990 года называўся Marathon, хоць яго склад быў абсалютна ідэнтычны арыгіналу, а асновай заставалася нуга з арахісавай пастай, піша Daily Mirror.
Паводле даных кампаніі Crunchie Munchies, якая вырабляе сублімаваныя кандытарскія вырабы, легендарны батончык атрымаў сваю назву ў гонар любімага каня сям’і Марс.
Справа ў тым, што да таго, як падараваць свету надзвычай папулярны прысмак, яго стваральнікі, Фрэнк і Этэль Марс, ужо дабіліся неверагоднага поспеху. Фрэнк Марс пачынаў у беднасці — дайшло нават да таго, што жонка пакінула яго, бо яго кандытарскі бізнес не прыносіў даходу.
Аднак у 1922 годзе Фрэнк усё ж сарваў куш дзякуючы іншаму папулярнаму батончыку — Milky Way. Поспех Milky Way ператварыў Фрэнка і яго другую жонку (якую, дарэчы, таксама звалі Этэль) у сапраўдных кандытарскіх магнатаў.
Атрымаўшы велізарныя даходы, Фрэнк захапіўся даволі дарагімі хобі, адным з якіх стала конегадоўля. Ён не проста купіў пару коней для верхавых прагулкаў у выходныя: Фрэнк і Этэль падыйшлі да справы з размахам і набылі ў штаце Ценесі ферму Milky Way Farms плошчай 3000 акраў, дзе працавала 100 чалавек.
Адзін з любімых коней Этэль быў каштоўны скакун, які загінуў незадоўга да таго, як у вытворчасць запусцілі новую версію Milky Way з дабаўленнем арахісу. Сужэнцы вырашылі назваць новы батончык у гонар гэтага каня — Snickers.
Паводле прадстаўніка Crunchie Munchies, гэтая гісторыя дэманструе, што ў сусветна вядомых брэндаў харчовых прадуктаў могуць быць нечакана асабістыя вытокі.
«Бачачы назву Snickers на паліцы крамы, мы рэдка задумваемся пра яе паходжанне. Яна гучыць вясёла і гуляўліва — здаецца, быццам яе прыдумалі маркетолагі, — але насамрэч гісторыя куды больш асабістая», — адзначыў ён.
Як адзначае Daily Mirror, для многіх брытанскіх спажыўцоў гісторыя паходжання арыгінальнай назвы батончыка стала сюрпрызам, бо, як мы згадвалі вышэй, у мясцовых крамах ён прадаваўся пад назвай Marathon.
Цікавыя факты пра Snickers
Шакаладка за 5 цэнтаў
Самы першы батончык Snickers быў выраблены ў Чыкага ў 1930 годзе і прадаваўся за пяць цэнтаў.
Спонсар Алімпіяды
У 1984 годзе Snickers стаў афіцыйным спонсарам Алімпійскіх гульняў 1984 года ў Лос-Анджэлесе. Кампанія Mars дамаглася статусу «афіцыйнай закускі» для Snickers, заплаціўшы аргкамітэту Алімпіяды 4 мільёны долараў і абавязаўшыся бясплатна падаваць цукеркі ўсім спартсменам-удзельнікам.
Такі крок выклікаў незадаволенасць дыетолагаў.
«Дзейная маркіроўка ўводзіць у зман: у спажыўцоў ствараецца ўражанне, што арганізатары Алімпіяды рэкамендуюць гэтыя цукеркі як карысную і сытную закуску», — заявіў тады дыетолаг Эдвард К. Гудштэйн.
Ён і іншыя спецыялісты па харчаванні баяліся, што такая рэкламная кампанія прымусіць «малых дзяцей паверыць, нібыта спажыванне Snickers або M&M’s дапаможа ім стаць спартсменамі». І гэты довад быў даволі абгрунтаваным, асабліва ўлічваючы, што ў рэкламе Snickers здымаўся гарналыжнік Карл Андэрсан, які сцвярджаў, што гэты батончык «дапамагае засяродзіцца на хуткасным спуску».
У Mars не сталі адступаць і прыцягнулі да абароны спонсарскай дамоўленасці ўласнага эксперта-дыетолага.
«У спартсменаў павышаная патрэба ў энергіі, і цукеркі — адзін са спосабаў яе папоўніць», — адзначыў доктар Дэніэл Розенфілд.
Найцікавейшае, што сам Андэрсан у Алімпіядзе 1984 года нават не ўдзельнічаў.
Крытыка і памеры
Супрацьлегла таму, як Snickers пазіцыянаваўся падчас Алімпійскіх гульняў 1984 года, гэты батончык зусім не з’яўляецца карысным для здароўя прадуктам. Mars гадамі падвяргалася жорсткай крытыцы з боку дыетолагаў, і ў 2012 годзе гэтае незадаволенне дасягнула піку.
Пад уплывам грамадскіх ініцыятыў у сферы аховы здароўя — такіх, як кампанія Мішэль Абамы Let's Move! («Давайце рухацца!») — у Mars вырашылі, што замест таго, каб пагаршаць праблему дзіцячага атлусцення, кампанія павінна ўнесці ўклад у барацьбу з ёй. Гэта азначала зніжэнне памеру стандартнага батончыка Snickers (каларыйнасцю 280 ккал) на 12%.
Mars не абышлася без стандартных заяў для прэсы пра тое, што «шакаладнай прадукцыяй Mars варта частавацца ў меру, у межах здаровага і збалансаванага ладу жыцця», аднак кампанія ўсё ж зрабіла пэўныя крокі да пазітыўных зменаў.
Акрамя памяншэння вагі звычайнага Snickers, у Mars абвясцілі пра замену буйнага фармату King Size на версію 2toGo: упакоўку з магчымасцю паўторнага закрыцця, якая змяшчае два батончыкі па 220 ккал кожны. Праўда, ці пакіне пакупнік другі батончык «на потым», залежыць выключна ад яго сілы волі.
Snickers у выглядзе марожанага
У 1989 годзе Snickers упершыню выйшаў у выглядзе марожанага. Яно захавала ўсе любімыя рысы класічнага батончыка, але з адной асаблівасцю: замест нугі ў ім выкарыстоўваецца марожанае са смакам арахісавай пасты.
«Ты не ты, калі галодны»
2010 год — кампанія выпусціла слоган «Ты не ты, калі галодны», які трывала асацыюецца менавіта са Snickers. Хоць першыя рэкламныя кампаніі былі анімацыйнымі і арыентаванымі на дзяцей, але брэнд запомніўся больш рэкламай з удзелам знакамітасцей, якія становяцца раздражняльнымі і сварлівымі праз голад, але з’еўшы батончык, становяцца добрымі і вясёлымі.
Гэта кампанія дапамагла зламаць негатыўную тэндэнцыю, з якой брэнд сутыкнуўся да запуску гэтай стратэгіі.
У першым роліку, паказаным падчас Супербоўла 2010 года, Эйб Вігада і Бэці Уайт удзельнічалі ў гульні ў амерыканскі футбол са спрашчанымі правіламі (тач-футбол). Рэклама не проста мела поспех — яна стала самым эфектыўным ролікам трансляцыі таго года. Гэты дэбютны ролік забяспечыў неверагодныя 400 мільёнаў бясплатных медыякантактаў, кошт якіх ацэньваўся прыкладна ў 28,6 мільёна долараў.
Адкліканне прадукцыі
У 2016 годзе кампанія Mars добраахвотна адклікала велізарную партыю сваёй шакаладнай прадукцыі з 55 краін пасля таго, як у батончыку Snickers быў выяўлены кавалачак пластыку.
«Вены» на Snickers
Адна з самых пазнавальных рыс батончыка Snickers — акрамя яго шматслаёвай начынкі — гэта характэрны рэльефны ўзор на паверхні. Прыхільнікі ласкава называюць гэтыя палоскі «венамі» батончыка. Аднак у 2022 годзе ў Twitter распаўсюдзілася выява Snickers з абсалютна гладкай паверхняй, што выклікала ў фанатаў шок і расчараванне. Услед за гэтым узнялася хваля чутак, якія аказаліся фэйкавымі.
У адказ прадстаўнікі Snickers запэўнілі фанатаў, што «вены» нікуды не знікнуць.
Поспех скрозь дзесяцігоддзі
Аб’ём продажаў Snickers у ЗША ў 2023 годзе перавысіў мільярд штук. Кампанія Mars штодня выпускае па 15 мільёнаў такіх батончыкаў.