У Расіі пачалі масава скарачаць медыкаў з-за праблемаў з бюджэтам
- 18.09.2026, 13:29
За паўгода галіна страціла дзесяткі тысяч работнікаў.
Рэгіёны Расіі ў першай палове 2026 года сутыкнуліся з хваляй скарачэнняў у бюджэтнай сферы, вынікае з дадзеных Расстата, на якія звярнуў увагу «Медвестнік».
Паводле афіцыйнай статыстыкі, за 6 месяцаў 4,3 тысячы работнікаў аховы здароўя і сацыяльнай сферы былі звольненыя па скарачэнні штату. Яшчэ 161,3 тысячы напісалі заявы аб звальненні «па ўласным жаданні».
Усяго з арганізацый аховы здароўя і сацыяльных устаноў звольніліся 185,3 тысячы чалавек. Прыняты на працу былі 165,9 тысячы. Такім чынам, агульная колькасць занятых у сектары скарацілася на 19,3 тысячы чалавек за паўгода.
Паводле апытання сярод лекараў, якое «Медвестнік» праводзіў у жніўні, больш за трэць (38%) работнікаў аховы здароўя сутыкнуліся з магчымым скарачэннем штату, якое абмяркоўвалася ў іх калектывах. Кожны сёмы лекар (14,8%) паведаміў, што скарачэнні ўжо пацверджаныя кіраўніцтвам — на 10–15%.
15-працэнтнае скарачэнне ў бальніцах запланавалі, у прыватнасці, улады Санкт-Пецярбурга. Паводле звестак «Фонтанкі», старшыня гарадскога камітэта па ахове здароўя Андрэй Сарана у чэрвені папярэдзіў галоўных лекараў пра верагоднае скарачэнне выдаткаў на медыцыну, а пазней ягоная намесніца Яна Ягорава пацвердзіла такую неабходнасць на нарадзе з фінансістамі бюджэтных устаноў.
Улады рэгіёнаў, з бюджэтаў якіх фінансуецца асноўная частка выдаткаў на медыцыну, «рэжуць» траты на ахову здароўя пасля таго, як летась сукупны дэфіцыт іх фінансаў усталяваў гістарычны рэкорд — 1,5 трлн рублёў. Сёлета «дыра» ў рэгіянальных бюджэтах можа павялічыцца да 2 трлн рублёў, прагназаваў раней Сбербанк.
Яшчэ ў красавіку старшыня камітэта па бюджэце і фінансавых рынках Савета Федэрацыі Анатоль Артамонаў даў указанне рэгіёнам правесці аўдыт выдаткаў з мэтай магчымай аптымізацыі малаколькасных бальніц і радзільных дамоў, а таксама законсерваваць будоўлі або перадаць прыватным інвестарам некаторыя будынкі медыцынскага комплексу. «Мы бюджэтныя грошы не заўсёды прывыклі берагчы, а да іх трэба ставіцца беражліва. Тады, можа быць, іх будзе хапаць. Але спачатку праанализуем, з чаго складаюцца выдаткі, што апраўдана, што не апраўдана і дзе можна аптымізавацца», — казаў ён.
Па выніках першага квартала кансалідаваныя бюджэты суб'ектаў РФ выдзелілі на фінансаванне паліклінік і бальніц на 6,4% менш, чым годам раней. Без уліку Масквы з гадавым бюджэтам амаль 5 трлн рублёў скарачэнне выдаткаў на медыцыну ў рэгіёнах склала 5,2% у гадавым выражэнні.