Лукашэнка перажыў «кашмар і жах» пад Шкловам

• 18.09.2026, 13:42

Дыктатар прыляцеў праверыць, як церабяць лён.

Прыехаўшы з інспекцыяй у Шклоўскі раён, Аляксандр Лукашэнка, падобна, быў не ў настроі. Калі яго верталёт сеў на поле сельгаспрадпрыемства «Говяды-Агро», кіраўнік адразу абурыўся якасцю ўборкі лёну, піша «Салідарнасць».

— Вы хацелі паказаць, як не трэба працаваць? За гэта трэба ў турму саджаць. Гэта такое церабленне лёну? Агідна. Я ад цябе (звярнуўся ён да старшыні Магілёўскага аблвыканкама — рэд.) гэтага не чакаў. А вам (кіраўніку Мінсельгасхарчу і памочніку ў рэгіёне — рэд.) я б параіў перастаць займацца тэорыяй, а пачаць займацца канкрэтнымі справамі. Гэта жах, кашмар. Будзем разбірацца. Такога быць не павінна. Лён — вы яго ўбралі тут? Вы яго загубілі тут, — заявіў Лукашэнка.

Гэта сведчыць пра тое, што вы топчацеся там, дзе часцей бывае прэзідэнт і дзе бліжэй да дарогі. А ў мядзведжыя куты вы не заязджаеце. Калі вы рызыкнулі прэзідэнта пасадзіць на гэта поле, то астатнія ў вас увогуле ў жахлівым стане.

Адказваючы на запыт прадпрыемства на некалькі дадатковых адзінак тэхнікі, Лукашэнка адзначыў, што не праблема — даць каманду на пастаўку тэхнікі, але пытанне ў тым, як гэтая гаспадарка пры такой працы за яе разлічыцца.

— Купляй. Але што ты купіш за гэты лён? Тут элементарнай дысцыпліны няма. Калі няма тэхналогіі, навошта даваць трактары і камбайны? — заўважыў ён.

Потым Лукашэнка накіраваўся на малачна-таварны комплекс «Говяды», дзе, паводле паведамлення яго прэс-службы, «даў некалькі практычных парад, як дзейнічаць і выбудоўваць працу ў гаспадарцы ў цэлым».

— Ніякай «зряплаты» тут быць не павінна. Калі не будзе дысцыпліны, то тут нічога не будзе, — прапісаў свой рэцэпт кіраўнік.

А вось прафілакторыем для цялят Лукашэнка застаўся задаволены.

— Вось гэта я прасіў пабудаваць. Не палац. Акуратны, камфортны цялятнік, без лішкаў. А падзеж у гаспадарцы — нулявы, — пахваліў сябе ён.

Кіраўнік таксама выслухаў даклад пра ўборку бульбы і новыя сарты беларускай селекцыі ў СФГ «Дыяна». І пастанавіў:

— Мы павінны больш вырошчваць бульбу ў Беларусі. Інтарэс да нашай бульбы ёсць і ў Расіі, і ў Узбекістане. Ураду пастаўлена задача — знайсці рынкі збыту, вызначыцца, дзе вырошчваць бульбу. Тым больш насення хапае. Што за бульбашы, якія бульбу не вырошчваюць?