Ліманскі напрамак перадалі новаму камандаванню ЗСУ

• 18.09.2026, 15:24

Расійскія войскі цяпер там «не ў найлепшым стане».

З 18 верасня Ліманскі напрамак перайшоў з зоны адказнасці Групоўкі Аб’яднаных Сіл у падпарадкаванне новага вайсковага аб’яднання «Цэнтр».

Пра гэта паведамляе РБК-Украіна са спасылкай на заяву спікера Групоўкі Аб’яднаных Сіл Віктара Трегубава у эфіры тэлемарафону.

Паводле прадстаўніка ЗСУ, змены датычацца толькі гэтага ўчастка фронту. Куп’янскі і Паўднёва-Слабажанскі напрамкі па-ранейшаму застаюцца ў зоне адказнасці Групоўкі Аб’яднаных Сіл.

Каму падпарадкавалі напрамак

Трегубаў таксама расказаў пра змены ў падпарадкаванні Трэцяга армейскага корпуса. Раней ён уваходзіў у склад Групоўкі Аб’яднаных Сіл, аднак цяпер адносіцца да новага аб’яднання «Цэнтр».

«Ліманскі напрамак літаральна з сённяшняга дня ў нас забіраюць, ён уваходзіць у зону падпарадкавання нанова створанага аб’яднання «Цэнтр», – патлумачыў спікер.

Што адбываецца на фронце

Асобна Трегубаў ацаніў сітуацыю на Ліманскім напрамку. Паводле яго слоў, расійскія войскі цяпер знаходзяцца там «не ў найлепшым стане».

Ён таксама адзначыў, што прыкмет аптымізму адносна таго, што адбываецца на гэтым участку, няма нават сярод расійскіх прапагандыстаў.