У Расіі верталёт з Z-прапагандыстамі пачаў падаць пры падлёце да аэрадрома

• 2.09.2026, 14:12

Пілот пасадзіў яго проста на дарогу.

Верталёт Мі-8, на борце якога знаходзіліся Z-прапагандысты і прадстаўнік выбарчай камісіі, пры падлёце да аэрадрома на Сахаліне рэзка пачаў губляць вышыню. Пілоту ўдалося пасадзіць машыну на дарогу, пасля чаго верталёт з'ехаў у кювет.

Як паведамляюць расійскія тэлеканалы, верталёт вяртаўся з мыса Цярпення, куды прадстаўнік выбаркама вылятаў для арганізацыі датэрміновага галасавання жыхароў цяжкадаступных тэрыторый на выбарах у Дзярждуму Расіі.

На борце знаходзіліся восем чалавек: тры члены экіпажа, супрацоўнік Сахалінскай абласной выбарчай камісіі і чацвёра Z-прапагандыстаў.

Нештатная сітуацыя адбылася пры падлёце да аэрадрома «Сакал» — верталёт пачаў імкліва губляць вышыню. Пілоту ўдалося пасадзіць машыну на трасу прыблізна ў кіламетры ад аэрадрома, пасля чаго яна з'ехала ў прыдарожны кювет.

У выніку пасажыры і члены экіпажа абышліся сінякамі і драпінамі. На самой дарозе пацярпелых не было.

Як удакладняецца, верталёт для арганізацыі галасавання ў аддаленых раёнах Сахалінскай вобласці быў прадастаўлены Міністэрствам абароны Расіі.