Lamborghini выпусціла дзіцячую каляску амаль за 5 тысяч долараў

• 2.09.2026, 16:27

Гэта хутчэй прадмет для калекцыянераў, чым рэч для паўсядзённага карыстання.

Кіраўніцтва кампаніі Lamborghini вырашыла, што раскоша і хуткасць павінны пачынацца з самага ранняга ўзросту, і прадставіла дзіцячую каляску коштам амаль 5 тысяч долараў, піша Motor1 (пераклад — сайт Charter97.org).

Навінка атрымала назву Reef AL Giallo і была створаная сумесна з брытанскім вытворцам тавараў для дзяцей Silver Cross. Праўда, разагнацца на ёй да сотні не атрымаецца.

Усяго ў свеце выпусцяць 500 экзэмпляраў, кожны з якіх атрымае індывідуальны нумар. Судзячы па ўсім, чарга па калекцыйную каляску можа апынуцца не менш прэстыжнай, чым чарга па некаторыя аўтамабілі гэтай маркі.

Reef AL Giallo пабудавана на платформе звычайнай каляскі, але атрымала знешні выгляд, натхнёны супераўтамабілямі Lamborghini. Люлька з глянцавага палікарбанату выкананая з вуглаватымі лініямі, што нагадваюць капот аўтамабіля, а вентыляцыйныя адтуліны ўпрыгожаныя фірмовым Y-вобразным узорам.

Сядзенне аздоблена аўтамабільнай замшаю і натуральным бамбукавым валокнам. Колы разлічаныя на розныя тыпы пакрыцця, а элементы падвескі дапоўненыя эфектнымі адкрытымі спружынамі фірмовага жоўтага колеру. Нават тармазная педаль выкананая ў стылі аўтамабіляў Lamborghini і аздобленая ўручную.

У камплект уваходзяць дажджавыя чахлы, маскітная сетка, люлька і іншыя аксэсуары. Вытворцы называюць навінку «прадметам раскошы» і «часткай дызайнерскай спадчыны».

Гэта мадэль прызначаная хутчэй для заможных калекцыянераў, чым для бацькоў, якім проста трэба давезці дзіця да дзіцячай пляцоўкі. «Гэта хутчэй прадмет для калекцыянераў, чым рэч для паўсядзённага карыстання», — пішуць аўтары.

Кошт суперкаляскі складае 4999,99 долараў.