Італія ўвядзе забарону на нашэнне паранжы і нікаба ў школах

• 20.09.2026, 21:01

Пра гэта паведаміла прэм’ер-міністр краіны.

Прэм’ер-міністр Італіі Джорджа Мелоні паведаміла пра падрыхтоўку законапраекта, які ўводзіць забарону на нашэнне ў школах паранжы і нікаба. Акрамя таго, ён прадугледжвае абмежаванне колькасці замежных вучняў у класе, паведамляе агенцтва ANSA.

На штогадовым сходзе маладзёжнага крыла партыі «Браты Італіі» Джорджа Мелоні заявіла, што вучні «павінны хадзіць у школу з адкрытым тварам, і ў Італіі ніхто, ці то ў імя сапраўднай або меркаванай традыцыі, не можа прымусіць дзяўчыну хаваць сябе». Патрабаванне аб абмежаванні колькасці замежнікаў у класах, паводле слоў прэм’ер-міністра, абумоўлена імкненнем захаваць якасць навучання і павысіць узровень інтэграцыі. «Калі ў класе толькі адно дзіця, якое не разумее італьянскай мовы, то яно, хутчэй за ўсё, зможа вывучыць гэтую мову і хутка інтэгравацца пры падтрымцы аднакласнікаў і настаўнікаў», — заявіла яна, адзначыўшы, што калі вучняў, якія не ведаюць мовы, шмат або нават большасць, «тады гэта не інтэграцыя, а нядбайнасць».

Акрамя таго, плануецца абавязаць бацькоў замежных вучняў таксама вывучаць італьянскую мову, калі ў сем’яў будуць сур’ёзныя цяжкасці з інтэграцыяй у грамадства. Пры гэтым Мелоні не ўдакладніла, якая максімальная колькасць замежнікаў можа быць у класе. Паводле звестак даследчага інстытута Fondazione ISMU, цяпер доля замежнікаў, якія наведваюць італьянскія школы, складае 11,6%, гэта значыць прыкладна 12 на кожныя 100 школьнікаў.