СМІ распавялі, што за «Пелікан» ляцеў на Маскву

• 20.09.2026, 22:53

Сталіца РФ пацярпела ад маштабнай атакі Узброеных сіл Украіны.

Узбраенне Pelican, якое прэзідэнт Украіны назваў адным з сродкаў паражэння Масквы 20 верасня, не з’яўляецца балістычнай ракетай. Пра гэта напісала РБК-Украіна са спасылкай на крыніцы.

Зяленскі ў сваім паведамленні не ўдакладніў, чым з’яўляецца Pelican. Але СМІ меркавалі, што гэта можа быць украінская балістычная ракета, запуск якой анансавалі на восень.

На карысць такой думкі гаварыў і той факт, што Pelican – гэта новы брэнд украінскай абароннай кампаніі Fire Point, якая вырабляе ракеты «Фламінго» і дроны FP-1 і FP-2. У красавіку кампанія зарэгістравала гандлёвую марку «Пелікан», таму з’явілася меркаванне, што такую назву атрымае яе балістычная ракета FP-7, паведамляла ў красавіку hromadske.

Аднак крыніцы РБК-Украіна ўдакладнілі, што насамрэч Pelican уяўляе сабой беспілотнік авіяцыйнага тыпу. Іншых звестак пра яго не раскрываюць, адзначылі суразмоўцы журналістаў.

Сталіцу Расіі гэтай ноччу атаквалі больш за 1,6 тыс. дронаў. Мэр Масквы Сяргей Сабянін заявіў, што атака стала «найбольш маштабнай і беспрэцэдэнтнай».