Літоўскія памежнікі збілі беспілотнік, што заляцеў з Беларусі, з кантрабанднымі цыгарэтамі

• 23.09.2026, 14:09

Гэта 58-ы з пачатку года перахоп падобных дронаў.

У Шальчынінкайскім раёне быў збіты беспілотнік, што заляцеў з тэрыторыі Беларусі, з тысячай пачак беларускіх цыгарэт — гэта 58-ы з пачатку года перахоп падобных дронаў, паведамляе Служба аховы дзяржаўнай мяжы Літвы.

Інцыдэнт адбыўся каля вёскі Лішкунішкес. Адзначаецца, што, заўважыўшы беспілотнік з грузам на экране цеплавізара, памежнікі неадкладна выкарысталі сваё службовае супрацьбеспілотнае абсталяванне, у выніку чаго БПЛА пачаў пасадку ў лясістай мясцовасці.

У двух выяўленых пакетах былі дзве заводскія каробкі цыгарэт «Мінск Суперслімс». Іх кошт ацэньваецца ў 5 510 еўра.

САДМ Літвы адзначае, што ў 2025 годзе памежнікі перахапілі 59 БПЛА з кантрабандай, якія ляцелі з Беларусі, у 2024-м — 54.