Горад у расійскай Хакасіі ўзялі ў «асаду» мядзведзі
- 23.09.2026, 14:25
Звяры напіраюць фактычна з усіх бакоў.
У Хакасіі (РФ), дзе з-за пачашчэння выпадкаў нападу на людзей было вырашана ўвесці рэжым падвышанай гатоўнасці, мядзведзі ўзялі «ў асаду» адзін з гарадоў, паведамілі расійскія ўлады.
Гаворка пра Абазу на поўдні рэспублікі, дзе пражывае больш за 11 тысяч чалавек. «Тайгавы горад фактычна ў мядзведжай асадзе — выхады звяроў фіксаваліся з усіх бакоў», — заявіў намеснік кіраўніка Хакасіі Дмитрий Бученик. Паводле яго слоў, у ноч на 23 верасня некалькіх жывёл удалося прагнаць; яшчэ траіх, адзін з якіх «быў велізарны», ліквідавалі паляўнічыя. Іншы мядзведзь, які знёс агароджу каля дачных участкаў, здолеў уцячы.
Напярэдадні кіраўнік Хакасіі Валентин Коновалов заявіў пра рашэнне ўвесці рэжым падвышанай гатоўнасці па ўсёй рэспубліцы. «Паводле даных Мінпрыроды, у Хакасіі налічваецца 2 245 асобін, на 609 больш, чым у 2022 годзе… Ужо ліквідавана 117 патэнцыйна небяспечных асобін», — паведаміў ён. Выпадкі нападу мядзведзяў на людзей апошнім часам былі зафіксаваны прыблізна ў 10 рэгіёнах РФ — пераважна ў Сібіры і на Далёкім Усходзе. У ноч на сераду мядзведзь забіў супрацоўніка лесанарыхтоўчай кампаніі ў Краснаярскім краі. Паводле даных рэгіянальнага ўпраўлення СКР, жывёла напала на 39-гадовага мужчыну, які ахоўваў тэхніку на тэрыторыі Епішынскага лясніцтва ў Енісейскім раёне. Пацярпелы загінуў на месцы.
19 жніўня каля пасёлка Артыбаш у Алтайскім краі мядзведзь напаў на намёт з двума турыстамі, выцягнуў з яго 29-гадовую дзяўчыну, забіў яе і прыкапаў у лесе. У Томскай вобласці РФ 20 верасня знайшлі целы двух мужчын, якіх таксама разарваў мядзведзь. З-за гэтага ў рэгіёне да 1 лістапада забаранілі масавыя мерапрыемствы і экскурсіі ў шэрагу раёнаў. Вырашаецца пытанне аб увядзенні рэжыму падвышанай гатоўнасці. Таксама інцыдэнты з мядзведзямі адбыліся ў Іркуцкай, Амурскай, Кемераўскай і Наўгародскай абласцях, Бураціі і Камчацкім краі.
Профільныя ведамствы рэгіёнаў Сібірскіх і Далёкаўсходніх федэральных акругаў тлумачаць частае з’яўленне мядзведзяў у населеных пунктах недахопам ежы ў тайзе, ляснымі пажарамі і несанкцыянаванымі звалкамі. Прадстаўніца Мінпрыроды Татьяна Арамилева адзначала, што ў Сібіры сёлета амаль няма натуральнага корму. «Па Сібірскім федэральным акрузе ўсе адзначаюць поўны неўраджай усіх кормаў. То бок няма і кедравага арэха. Няма ляшчыны, няма ягад, няма грыбоў. То бок практычна мядзведзь ідзе ў зімоўку галодным», — тлумачыла яна.