У Нясвіжскім замку прадаюць сувенір за $2,8 тысячы

• 23.09.2026, 19:48

Фотафакт.

Чытач выдання Myfin.by Аляксандр расказаў, што падчас паездкі ў Нясвіжскі замак зайшоў у мясцовую сувенірную краму і звярнуў увагу на цэннік з уражлівай лічбай.

«Думаў, што памыліўся ў лічбах, — вырашыў, што там напісана, можа, 85 рублёў або, добра, 858 рублёў. Але не восем з паловай тысяч. Упершыню бачу ў сувенірнай краме Беларусі настолькі дарагую рэч», — здзіўляецца Аляксандр.

На цэнніку пазначана, што паяс за 8 580 BYN зроблены ў Беларусі (вытворца — «Слуцкія паясы»), яго памеры — 325 на 32 сантыметры.

Дарэчы, гэта яшчэ не самы дарагі слуцкі паяс — на сайце галерэі рамёстваў «Славутасць» ёсць варыянты паясоў за 10 тысяч BYN і за 11 тысяч BYN.

Справа ў тым, што вытворчасць такога паяса сама па сабе дарагая. У рэпартажы СТБ Таццяна Новік, экскурсавод музея гісторыі слуцкіх паясоў прадпрыемства «Слуцкія паясы», тлумачыла, што выраб класічнага паяса памерам 3,5 метра на 35 сантыметраў займае 60 гадзін (то бок 1,5 тыдня працы пры 8-гадзінным працоўным дні на «пяцідзёнцы»). Прадпрыемства выкарыстоўвае натуральны шоўк з даданнем золата або срэбра, хоць выпускае таксама і варыянты з сінтэтычнага матэрыялу. Выкарыстоўваецца станок, аналагаў якому, нібыта, няма ў свеце.

Нядаўна вырабленыя слуцкія паясы выкарыстоўваюць, напрыклад, як дыпламатычны падарунак — сёлета вясной Аляксандр Лукашэнка падарыў паяс Кіму Чэн Ыну падчас візіту ў КНДР.