Renault стварыла ідэальны рэтра-спарткар

• 24.09.2026, 13:51

Але не для продажу.

Renault прадставіла канцэпт 8 Gordini — сучаснае электрычнае купэ, натхнёнае легендарнай спартыўнай мадэллю 1960-х. У адрозненне ад арыгінала, у навінкі ўсяго два месцы, шырокі нізкі кузаў і цалкам электрычная сілавая ўстаноўка, піша Motor1 (пераклад — сайт Charter97.org).

Канцэпт атрымаў электрарухавік на задняй восі магутнасцю 270 к.с., які захаваў галоўны тэхнічны прынцып арыгінальнага 8 Gordini — задні прывад. Даўжыня аўтамабіля складае 4,12 метра, шырыня — 1,88 метра, а вышыня — усяго 1,27 метра. Спераду ўсталяваныя 19-цалёвыя колы, ззаду — 20-цалёвыя.

У дызайне Renault выкарыстала фірмовы блакітны колер, падвойныя белыя палосы, круглыя фары і пашыраныя калёсныя аркі. Нават палосы зрабілі функцыянальнай часткай кузава — яны злучаныя з элементамі паветраводаў і працягваюцца ў афармленні салона.

Інтэр'ер выкананы ў духу мінімалізму. Тут няма вялізнага экрана на ўсю панэль: замест яго ўсталяваныя невялікія лічбавыя прыборы, натхнёныя арыгінальным аўтамабілем. Вобраз дапаўняюць алюмініевыя элементы, алькантара і сядзенні з сіняга вельвету.

«Мы ўзялі асноўныя рысы арыгінальнага 8 Gordini і на іх аснове стварылі цалкам сучасны аўтамабіль», — піша Motor1.

Аднак серыйнай версіі не будзе. Renault стварыла адзіны экзэмпляр выключна для вывучэння магчымасцей сучаснага пераасэнсавання сваёй аўтамабільнай гісторыі.

Публіцы канцэпт пакажуць на Парыжскім аўтасалоне, які пройдзе з 12 па 18 кастрычніка.