У Маскве дзіўна адрэагавалі на словы Зяленскага пра візіт «на ракеце»

• 24.09.2026, 14:26

Пяскоў не пачуў «адмовы».

У Крамлі заявілі, што не чулі аб адмове Уладзіміра Зяленскага прыехаць у Маскву. Так прэс-сакратар Пуціна Дзмітрый Пяскоў адрэагаваў на вірусны адказ украінскага прэзідэнта расійскаму журналісту ў Нью-Ёрку.

Прэс-сакратар Уладзіміра Пуціна Дзмітрый Пяскоў пракаментаваў словы Уладзіміра Зяленскага пра магчымы візіт у Маскву.

«Па-першае, Зяленскі не адмаўляўся ад паездкі ў Маскву. Я, прынамсі, пра гэта не чуў. Цяпер ён робіць шмат заяў у кулуарах Генеральнай Асамблеі ў Нью-Ёрку. Што да спынення агню, мы яшчэ раз паўтараем: мы адкрытыя для мірнага ўрэгулявання. Мы лічым, што трэба імкнуцца да міру, а не да часовага перамір'я», — заявіў ён.

Прычынай гэтай рэакцыі стала кароткая размова 23 верасня ў кулуарах Генеральнай Асамблеі ААН. Калі ўкраінскі прэзідэнт з суправаджэннем праходзіў міма журналістаў, расійскі рэпарцёр з натоўпу выкрыкнуў пытанне: «Калі збіраецеся ў Маскву?».

Зяленскі, не задумваючыся, адказаў фразай «На ракеце, бл*». Відэа з гэтым момантам апублікавала медыя Clash Report, і запіс імгненна разляцеўся па сацсетках, сабраўшы хвалю адобральных каментарыяў ва ўкраінскім сегменце інтэрнэту.

Раней у Крамлі неаднаразова заяўлялі, што сустрэча Зяленскага і Пуціна магчымая толькі ў Маскве.