Суд ЕС адмовіўся здымаць санкцыі з МАЗа і БЕЛАЗа

• 24.09.2026, 16:05

Прадпрыемствы спрабавалі абскардзіць рашэнні Бруселя.

Суд ЕС адхіліў пазовы кіравальных кампаній холдынгаў «БЕЛАЎТАМАЗ» і «БЕЛАЗ-холдынг», якія спрабавалі дамагчыся адмены рашэнняў аб захаванні супраць іх санкцый. Рашэнні па абедзвюх справах былі вынесеныя 23 верасня. Пра гэта піша тэлеграм-канал The Sanctions Law.

Гаворка ідзе пра справы Мінскага аўтамабільнага завода (МАЗа) і БЕЛАЗа.

Прадпрыемствы аспрэчвалі фактычнае атаясамліванне дзяржаўнай уласнасці з падтрымкай рэжыму Аляксандра Лукашэнкі. Аднак суд палічыў падставы, прадстаўленыя раней Саветам ЕС, дастатковымі. Пры ацэнцы ўлічваліся адразу некалькі абставінаў: дзяржаўная форма ўласнасці прадпрыемстваў, іх значэнне для беларускай эканомікі, а таксама тое, што яны з'яўляюцца крыніцай паступленняў для дзяржавы.

Разглядаючы справу МАЗа, суд улічыў прыкметны рост вытворчасці і продажаў кампаніі, а таксама публічную ацэнку Аляксандра Лукашэнкі, які называў прадпрыемства адным з ключавых для беларускай прамысловасці.

Па БЕЛАЗе суд прыняў да ўвагі звесткі пра прыбытковасць прадпрыемства і новыя пастаўкі тэхнікі.

Прадпрыемствы таксама адзначалі наступствы санкцый для сваёй дзейнасці і працаўнікоў. МАЗ, у прыватнасці, сцвярджаў, што абмежаванні спрыяюць далейшаму ўзмацненню эканамічных сувязяў Беларусі з Расіяй.

Суд адзначыў, што магчымыя негатыўныя наступствы санкцый — у тым ліку для працаўнікоў кампаній — самі па сабе не робяць абмежавальныя меры незаконнымі. Аргумент пра тое, што санкцыі ўзмацняюць эканамічныя сувязі Беларусі і Расіі, таксама не пераканаў суд.