Беларусы змогуць падаваць заявы на від на жыхарства Літвы ў Арменіі і Грузіі
- 25.09.2026, 10:53
Пра гэта паведаміла МУС Літвы.
Беларусы змогуць падаваць заявы на атрыманне часовага віду на жыхарства ў Літве ў падраздзяленнях знешніх пастаўшчыкоў паслуг у Арменіі і Грузіі. Пра гэта паведамляе «Зеркало» са спасылкай на Міністэрства ўнутраных спраў Літвы.
«Каб працадаўцы і далей маглі прыцягваць недастатковую рабочую сілу з Беларусі, грамадзянам гэтай краіны прадастаўляецца магчымасць падаваць заявы на часовы від на жыхарства ў Літоўскай Рэспубліцы ў падраздзяленнях знешніх пастаўшчыкоў паслуг у Арменіі і Грузіі», — адзначылі ў міністэрстве.
У ведамстве падкрэслілі, што калі б такая магчымасць не была створаная, то з 1 лістапада беларусы больш не змаглі б прыязджаць у Літву з мэтай працы. З гэтай даты ўступаюць у сілу папраўкі да Закона аб прававым становішчы замежнікаў.
Змены пазбаўляюць магчымасці падаць дакументы на від на жыхарства па працы або навучанні замежнікаў, якія прыбылі ў Літву толькі з шэнгенскай візай або нацыянальнай візай іншай краіны.
З 1 лістапада падаць дакументы на літоўскі від на жыхарства па працы або навучанні змогуць толькі тыя, хто мае:
- дзейсны від на жыхарства або літоўскую нацыянальную візу,
- дзейсны від на жыхарства іншай краіны ЕС або краіны Шэнгенскай зоны,
- законныя падставы для бязвізавага знаходжання.
У Беларусі няма знешняга пастаўшчыка паслуг, таму падаць заяўку на літоўскі від на жыхарства на падставе працаўладкавання з нашай краіны немагчыма.
Зараз беларусы звяртаюцца па часовы від на жыхарства па працы, знаходзячыся ў Літве, ў Дэпартамент міграцыі.
Паколькі з 1 лістапада замежнікі, уключаючы грамадзян Беларусі, з некаторымі выключэннямі, не змогуць падаваць заявы на від на жыхарства на тэрыторыі Літоўскай Рэспублікі, узнікла б сітуацыя, калі беларусы не змаглі б падаць дакументы ні за мяжой, ні ў Літве. Таму нашым суграмадзянам прадастаўілі магчымасць падаваць заявы ў падраздзяленнях знешніх пастаўшчыкоў паслуг іншых краін, у прыватнасці — у Арменіі і Грузіі, піша LRT са спасылкай на каментар МУС агенцтву BNS.