Bloomberg: Трамп заклікаў Зяленскага паехаць на перамовы да Пуціна ў Маскву

• 26.09.2026, 3:02

Украінскі лідар катэгарычна адхіліў такую прапанову.

Прэзідэнт ЗША Дональд Трамп прапанаваў прэзідэнту Украіны Уладзіміру Зяленскаму паехаць у Маскву на сустрэчу з Уладзімірам Пуціным. Пра гэта піша Bloomberg са спасылкай на дасведчаныя крыніцы. Паводле дадзеных агенцтва, з такой ініцыятывай Трамп выступіў падчас сустрэчы з украінскім лідарам на палях Генеральнай Асамблеі ААН у Нью-Ёрку. Зяленскі адказаў адмовай, а блізкія да яго крыніцы адзначылі, што прапанова Трампа яго засмуціла.

Financial Times са спасылкай на ўкраінскіх чыноўнікаў, якія прысутнічалі на сустрэчы, аднак паведамляе, што такой ініцыятывы ад Трампа не паступала. Паводле іх слоў, лідары абмяркоўвалі магчымыя будучыя трохбаковыя перамовы, але прапанова пра паездку Зяленскага ў расійскую сталіцу, пра якую піша Bloomberg, не гучала.

Кіеў неаднаразова прапаноўваў правесці асабістую сустрэчу Пуціна і Зяленскага на нейтральнай тэрыторыі. Расійскі бок кожны раз адхіляў гэты варыянт і настойваў на перамовах у Маскве. У адказ украінскія ўлады ўказвалі на абсурднасць такой прапановы і прапаноўвалі Пуціну прыехаць у Кіеў.

У сярэдзіне верасня Зяленскі заявіў пра гатоўнасць сустрэцца з Пуціным на палях саміту «Вялікай дваццаткі» (G20), які адбудзецца ў ЗША ў снежні, і адзначыў, што Украіна знаходзіцца ў «вельмі добрай перамоўнай пазіцыі». У Крамлі ў адказ традыцыйна адхілілі ініцыятыву і зноў прапанавалі прэзідэнту Украіны прыехаць у Маскву.

23 верасня ЗША запрасілі Пуціна на снежаньскі саміт G20. Прэс-сакратар прэзідэнта РФ Дзмітрый Пяскоў заявіў, што ў Крамлі вітаюць гэтае рашэнне. Паводле яго слоў, Масква «вызначыцца» і «прапрацуе гэтую тэму па дыпламатычных каналах». Пры гэтым у той жа дзень Пяскоў зноў нагадаў пазіцыю Крамля адносна магчымай сустрэчы Пуціна і Зяленскага. «Наша пазіцыя добра вядомая. Пуцін сказаў, што Зяленскі, калі хоча, можа прыехаць у Маскву», — сказаў прэс-сакратар.