Армія РФ апынулася ў пастцы: ЗСУ прарвалі лінію фронту
- 26.09.2026, 11:11
Украінскія вайскоўцы старанна падрыхтаваліся да контрнаступальных дзеянняў.
Трэці армійскі корпус ЗСУ сарваў планы краіны-агрэсара Расіі па акружэнні Славянска-Краматорскай агламерацыі і не даў акупантам разгарнуць наступ на Барвінкава з поўначы, у раёне Лімана.
Пра гэта ў інтэрв'ю «Главреду» расказаў ваенны эксперт, лятчык-інструктар і палкоўнік запасу ЗСУ Раман Світан. Паводле яго слоў, поспех супрацьудару ўкраінскіх сіл звязаны з выбарам участка фронту і дакладным разлікам моманту атакі.
«Тройцы» дасталася самы складаны ўчастак фронту на дадзеным этапе — паўночна-ўсходняя частка Славянскай абароннай групы. Менавіта тут, у раёне Лімана, расіяне планавалі наступ з выхадам на Барвінкава, каб перарэзаць лагістыку Славянскай групоўкі з пастаўкамі з боку Ізюма», — патлумачыў ён.
Паводле эксперта, аперацыю ў фармаце супрацьудару рыхтавалі прыкладна паўгода — расіян спрабавалі завабіць у вузкі калідор паміж украінскімі флангавымі падраздзяленнямі, а ўдар нанеслі акурат тады, калі праціўнік ужо святкаваў перамогу. Нягледзячы на лакальны маштаб супрацьудару, наступствы для стратэгічных планаў Крамля аказаліся значна больш маштабнымі.
«Не дазволіўшы разгарнуцца на поўнач ад Славянска гэтай «клешні» з выхадам на Барвінкава, фактычна нівелявалі стратэгічную перспектыву захопу ў абыход Славянска-Краматорскай агламерацыі», — падкрэсліў Світан.
Страціўшы магчымасць абысці агламерацыю з поўначы, камандаванне РФ, на думку Світана, застаецца з адзіным, надзвычай нявыгадным сцэнаром.
«Цяпер у іх застаецца адзін варыянт — ісці ў лоб, наўпрост спрабаваць штурмаваць гэтую агламерацыю. А гэта для іх вельмі цяжка, таму што там даволі сур'ёзны ўмацаваны раён, які проста так не ўзяць», — адзначыў эксперт.
Губляе сэнс і разгортванне наступу з паўднёва-захаду ад Краматорска — праз Пакроўск, Мірнаград і Дабраполле да Барвінкава: без паўночнай «клешні» паўднёвая проста не патрэбная. Затое напрамак галоўнага ўдару, верагодна, у бліжэйшы час зрушыцца.
«Расіяне, хутчэй за ўсё, цяпер тэрмінова пераарыентуюць напрамак руху гэтай паўднёва-захадняй «клешні» непасрэдна ў бок Краматорска — ад Дабраполля па грыве вышыняў. Там перапад вышыняў складае прыблізна 200 метраў», — мяркуе Світан.
Для гэтага манеўру Расіі спатрэбяцца дадатковыя сілы і тэхніка, а асабовага складу ў гэтым раёне яна ўжо страціла нямала — хоць альтэрнатывы, паводле ацэнкі эксперта, у Крамля практычна няма.
У чым сакрэт паспяховай аперацыі Сіл абароны
Нягледзячы на тактычны маштаб аперацыі, Трэці корпус пашырае зону кантролю ў глыбіні пазіцый праціўніка.
«Два «сезоны» яны ўжо згулялі Вівальдзі, будуць трэці і чацвёрты. Галоўнае, каб для расіян яны скончыліся Моцартам — «Рэквіемам», — дадаў эксперт.
Тлумачэнне таго, чаму корпус справіўся з задачай, зводзіцца да некалькіх фактараў.
«Па-першае, добрае планаванне — аперацыю разгортвалі ва ўмовах жорсткай інфармацыйнай цішыні. Па-другое, прафесійныя камандзіры аператыўна-тактычнага ўзроўню. І самае галоўнае — паўнацэнны корпус са стопрацэнтным укамплектаваннем. Такая ўкамплектаванасць у нас ёсць толькі ў некалькіх карпусоў», — адзначыў Світан.
Паводле таго ж прынцыпу, кажа эксперт, паспяхова дзейнічае і Першы корпус Нацгвардыі, што працуе на поўнач ад Купянска, — і таксама дзякуючы поўнай укамплектаванасці.
Каб падобныя вынікі змаглі паўтарыць і іншыя злучэнні, на думку Світана, неабходна сістэмнае рашэнне па кадравай укамплектаванасці арміі.
«Нам цяпер трэба каля 150 тысяч падрыхтаваных, матываваных байцоў. Тады ўсе 16 нашых карпусоў змогуць стрымліваць расіян па ўсёй лініі фронту і перамолваць войскі, што наступаюць. Расіяне, хутчэй за ўсё, разгорнуць наступ ужо з выкарыстаннем тэхнікі — як толькі з'явіцца туман», — папярэдзіў Світан.