Трамп не прыняў прапанову Ірана аб перамір’і
- 26.09.2026, 11:30
ЗША рыхтуюцца аднавіць бамбардзіроўкі.
Прэзідэнт ЗША Дональд Трамп адхіліў прапанову Тэгерана аб сямідзённым спыненні агню і паведаміў сваім памочнікам, што разлічвае аднавіць бамбардзіроўкі Ірана пасля прамежкавых выбараў у Кангрэс у лістападзе. Пра гэта паведамляе The Wall Street Journal са спасылкай на нянaзваных амерыканскіх чыноўнікаў. Да таго стала вядома, што ўлады Ісламскай Рэспублікі, парты якой знаходзяцца ў марской блакадзе ЗША, праз пасярэднікаў прапанавалі Трампу аднавіць суднаходства праз Армузскую пратоку і ядзерныя перамовы ў абмен на зняцце блакады, якая наносіць сур’ёзную шкоду эканоміцы краіны.
Паводле суразмоўцаў, непублічна Трамп са скепсісам выказваецца адносна гатоўнасці Ірана выканаць яго патрабаванні аб поўнай адмове ад ядзернай праграмы. Ён лічыць аднаўленне бамбардзіровак «вельмі верагодным», сказалі крыніцы. Наколькі маштабнымі могуць быць такія ўдары, пакуль незразумела. Пазіцыя Трампа можа змяніцца па меры зацягвання канфлікту ў бліжэйшыя тыдні, а таксама пад уплывам вынікаў прамежкавых выбараў. Тым не менш абодва бакі праз пасярэднікаў працягваюць перамовы па шэрагу пытанняў, уключаючы ядзерную праграму Тэгерана, а Вашынгтон паведаміў Тэгерану, што Трамп не мае намеру адмяняць марское эмбарга, паведамілі крыніцы.
ЗША лічаць, што эканамічны ціск урэшце прымусіць Іран падпісаць пагадненне на ўмовах, выгадных Вашынгтону і арабскім дзяржавам Персідскага заліва.
Раней кіраўнік МЗС Ірана Абас Арагчы распавёў, што Тэгеран прапанаваў Вашынгтону «пры выкананні пэўных умоў» аднавіць суднаходства праз Армуз праз тыдзень і зноў пачаць перамовы аб канчатковым урэгуляванні канфлікту. Прапанова грунтуецца на чэрвеньскім мемарандуме аб узаемаразуменні. Мяркуецца, што ЗША павінны зняць блакаду іранскіх партоў, разблакіраваць замарожаныя сродкі Тэгерана і адмяніць нафтавыя санкцыі.
Пры гэтым прэзідэнт Ірана Масуд Пезешкян, выступаючы на Генасамблеі ААН у Нью-Ёрку, заявіў, што яго краіна не дапусціць свабоды суднаходства праз Армузскую пратоку, пакуль дзейнічаюць санкцыі і блакада з боку ЗША. Ён таксама дадаў, што Іран не адмовіцца ад права на распрацоўку ядзерных тэхналогій у эканамічных мэтах.